Kaindi, bayuni bakaba amuswaangano. Bakali kuyanda mwami mbuli bantu abanyama. Muyuni nzi weelede kuba mwami?

"Sikwaze. Muyumu alimwi uleelelwa bwami!" wakapozomoka muyuni umwi. "Peepe, tajisi mpande alimwi kuti naa waita, umvwika kuusa," wakaamba umwi. "Mpowani! Nkaambo nguinda kukomena alimwi ulavwuluma mbuli syuumbwa," umwi wakapozomoka. "Peepe. Takonzyi kuuluka. Mwami wabayuni weelede kuti kacikonzya kuuluka."

"Ndime deelede kuba mwami, kayi ndi mubotu," Kabbeekku kakaamba kakabbekula mweeye wako. "Ulaliyanda kapati," Tumba wakaamba. "Mebo ndilaamenso mapati kwiinda bayuni boonse. Ndeelede kuba mwami." "Peepe. Kuleka nduwe Tumba!" bayuni bamwi bakapozomoka. "Uloona lyazwa zuba!"

Aboobo bayuni tiibakasakana mukusala mwami. Mpoona muyuni umwi wakaba amuzeezo. "Ooyo utiiuluke mujulu kwiinda bayuni boonse ngutiibe mwami," muyuni ooyo wakaamba mukajwi kakwe kacisimbi. "Inzya! Inzya!" Bayuni boonse bakoongolola. Eeelyo boonse bakauluka mujulu, mumulengalenga.

Dada lyakauluka kwabuzuba bomwe, ndeelyo lyalulama atala amalundu ainda kulampa munyika. Sikwaze wakauluka kwamazuba obile mumulengalenga, kali atala amilundu. Pele Sikube wakaulukisya kwamazuba otatwe kakunyina kwiima, ngooyo walilulama zuba. Atala, bayuni bakamvwa Sikube walila, "Ndime eeli mujulu. Ndendime mwami."

Ono atala lyakwe, Sikube wakamvwa kajwi kati, "Tii, tii, tii! Ndime eeli mujulu. Ndendime mwami." Aaka kakali Katiiti, kayuni kaniini kubayuni boonse. Katiiti kakajisilidi kupepe pati lyabbaba lya Sikube ciindi Sikube naakali kuuluka mujulu, mumulengalenga.

"Tokoondiinda alimwi," Sikube wakaamba. Mpoona wakalungumana, waulukila mujulu alimwi. Wakauluka akuulukila atala limwi wasimpa. "Ndimujulu kwiinda bayuni boonse. Ndendime mwami wanu!" Sikube wakakwiila.

Pesi munsi abbaba lya Sikube kwakajisilidi kayuni kaniini. "Tii, tii! Tii, tii! Ndime, ndemuniini! Ndendime mwami wanu." Sikube wakakatala. Takacilikukonzya kuulukila mujulu.

Aboobo wakaselemuka kuya ansi Katiiti akalo kakali mubbaba. Bayuni bamwi bakanyemena Katiiti. Bakakalindila kuti bakajwe mapepe oonse.

Pesi Katiiti kakabona mbobakanyemede bayuni bamwi. Kakafwambaana kuulukila mubwina bwanzoka. Bayuni bakalikulindila bakaambila Tumba kabati, "Yebo oola menso mapati, kkala awa ugatele bwina kutegwa mbokatiizwide buyo Katiiti ukajate." Aboobo Tumba wakakkala kumbele abwina.

Ono zuba lyakali kubala. Muciindi cisyoonto buyo Tumba wakoona. Kanga Katiiti kakasondela. Nokakabona kuti Tumba woona kakazwa akuulukila mujulu, nkaako kaakusakana.

Akaambo kakuti Tumba wakalekela Katiiti kuti katije, Tumba wakausa. Ono uvwima buyo masiku. Masikati, uloona, kutija kubonwa abayuni bamwi.