Kaindi Inkuku alimwi a Sikwaze muyuni bakali kumvwana. Bumwi buzuba Sikwaze wakajana nkuku kayiimvwi akuulu komwe ilalyookezya. Yakali mujungusi a cisamu ciindi niyakazwa kumatoolo nkuyakaunkide kuyakuula zyintu.

"Ino kuulu kwako kumwi wakutola kuli musa?" Sikwaze wakabuzya Nkuku cakugambwa.

Nkuku yakati kuli Sikwaze, "Ndacincanya kuulu kwangu alimwi azyintu ezyi. Musambazi watenda kuulu kwangu akundipa katuundu ooyu."

Mpoonya aawo Sikwaze moyo wakamuzwa amvwe biyo boobo. Wakabuzya nkuku kuti naa awalo inga wacincanya nkaambo kakuti awalo wakali kutuyand tufulefule twamumatoola. Kakwiina akusowa ciindi, Nkuku yakazumina kuti, "Pe, kunyina abubi nabuba bomwe."

Eelyo Sikwaze wakanyamuka alimwi akuunka kumusambazi mucintoolo. Wakaamba cakulomba kati, "Amundikosole kumwi kwamauli aagu obile kucita kuti tucincanye azintu zyeyanda mucitoolo cenu." Musambazi wakacita kweendelana akulomba kwa Sikwaze.

Nkaambo kaako Sikwaze wakaunka ku nga'nda yakwe kayaabubbunkutila nokuba kuti wakazwide kukkomana mumoyo alimwi alumwemwe kumeso aakwe akaambo kakuti wakapegwa ncaakalikuyanda.

Inga ba sikwaze uciya kubbunuka biyo akulanga aakaimvwi nkuku, nkujana nkuku maulu anjiyo alikkwene oonse obile.

Eeci cakamunyemya Sikwaze nkabela wakalinzunza kuti ajate Inkuku alimwi akuyuuma pele yakatija akumusiya mukasuko. Wakaalilwa kwiijata. Abone boobo, wakaba amuzeezo wakuti kalya biyo bana bankuku kumfumbwa mpaabajana. Kuzwa lyeelo kusikila sunu, Sikwaze ulalya twana twankuku kumfumbwa kutujana katucela abamanyina.