Nkuku a Joongola zyakalikumvwana. Nokuba boobo bakalikuyanda kuzundana bunji bwaziindi. Bumwi buzuba bakayeeya kuti baume bbola kutegwa bazyibe kuti mukali nguni akati kabo.

Bakaunka nkobasobanina bbola yamaulu mpoona bakatalika musobano wabo. Nkuku yakali kweenda, pele joongola lyakali kweendesya. Nkuku yakabbakela bbola kule, pesi joongola lyakaindilizya kubbakela aaka bbakelela Inkuku. Inkuku yakatalika kulimvwa kutyompwa.

Bakayanda kuti baume mapenaauti. Joongola nguwasanguna kuya mugoolo. Inkuku yakanywisya biyo bbola yomwe. Mpoonya ono cakasika ciindi cakuti inkuku ayalo ijate bbola mugoolo.

Njoongola wakiibbakela bbola akunywisya. Joongola wakanyunya akunywisya. Joongola wakayuumya mutwe bbola akunywisya. Eelyo joongola antoomwe wakanywisya magoolo osanwe.

Nkuku yakanyema akaambo kakuzundwa. Yakazundwa cibyaabi. Joongola wakagwetemuka kuseka mweenzinyina akaambo kambuli mbwaakalikulibonya ameso.

Yakanyema Nkuku mpoonya yakajula mulomo akumumena Joongola.

Nkuku mbuli mbuyakali kweenda kuya kumunzi, bakaswaangana abanyina Joongola. "Sena wamubona mwanaangu Joongola?" bakabuzya banyina. Inkuku kunyina nciyakaamba nociba comwe.

Kabacili antoomwe banyina joongola bakamvwa kajwi kasyoonto kakalila kuti, "Amundigwasye baama!" Banyina joongola bakazibauka koonse-koonse cakubikkila maanu. Kajwi kakali kulimvwisya kuzwida mwida lyankuku.

"Belesya nguzu zyako zyandeene mwanaangu!" Bakamponzomoka banyina joongola. Majoongola alabamba kanunko kamwi kaya kabi alimwi akupa kubija mukanwa. Inkuku yakatalika kumvwa bubi, kumvundaukwa kumoyo.

Inkuku limwi yakatimfuka, "Vuuu," mpoonya yamena alimwi akuswida. Alimwi yakakola alimwi yakeesyamuka, utesyeee! Joongola lyakalikusesemya! Kamunyongana kanunko, takali kakusobanina pe.

Yakakola nkuku kusikila liwi yakola joongola kuzwa mwida. Banyina joongola alimwi amwana bakasweemuka selelele kutanta mucisamu akuyuba.

Kuzwa ciindi eeco, majoongola alimwi ankuku tazilyatani.