Makani aakuti muzomvu ulaampemo ndamfu kapati alizibikidwe kubantu boonse.

Pele ono amuzibe kuti kumazuba akaindi mpemo eeyi tiiyakalimfwaafwi mbuli mbomwiibona ciindi ecino. Yakali ndamfu nkabela ineneede akuneneya.

Bumwi buzuba kana ka muzomvu kakazyalwa. Kakali kacenjezu alimwi akubikkililizya akuyandisisya kuziba zintu zyoonse zyakakazingulikide muciinga. Kakalikunga kalabuzya-buzya kucinyama cilicoonse ncikabona kumakani abube bwazintu.

Nikakaibona Indyabuluba kakanyongana mukati mumizeezo yankako eelyo limwikakaibuzya kakati, "We!" "Ino kayi nkaambonzi yebo olikke mukosi wako mulamfu boobo?"

Kakacigambidwe kubulamfu bwamukosi bwandyabuluba, meso ankako akayaana alimwi amunyama uutegwa cipembele. Kakamubuzya awalo ikuti, "Inokayi yebo lwija lwako lubosya-bosya buti boobu?"

Nkaako kakaakulijana kuli cimvubwe nkabela awalo kakamubuzya, ndaambile, "Ncinzi yebo meso aako alasubula pyu mbuli nkandamalowa?"

Mukubonana a aciwena kakaba amubuzyo kulinguwe. "Hena walo ciwena inga ulyanzi masiku?"

"Otusabila!" bakaamba cabukali banyina. "Taanguna ugole mpoona aawo. Taulimubuzyo ngonga wandibuzya ooyo peepe." Kamvwe boobu, kana kamuzomvu kakazwa alimwi akuunka kakanyemede kapati.

Eelyo mukulaba kwaliso, wakaswelemuka muyuni cikwaangala kulinkako mpoona akukanana ankako kati, "Konditobela, atweende kumulonga kwalo ooko nkoya kubona ciwena ncalya." Kayi bensiku bakaamba kale kuti, "Libonene ameso kuluudwa cilakatazya."

Kakunyina akusowa ciindi, kana kamuzomvu kakamutobela cikwaangala kumulonga.

Kakaleta yamusokwe paka limwi kasika kumulonga eelyo akwiimikila kumbembele lya mulonga. "Ndiyanda kulibonene sunu." "Ulikuli ciwena ooyo ndati?"

"Kamwaamba," lyakalimvisya ijwi kuzwa mumundomba wabbwe mumona mumulonga. "Tulikabotu," kakamviila akalo. Amundaambile buzuba bwasunu kuti ciwena ulyanzi masiku?

"Kaambo nkaniini aako." "Utabi nopenga pe mumoyo wako." "Okuno nkooboola makani ulaajana akwaaziba mbulimbwaabede," lyakaamba jwi mumwala wabbwe. "Nkooko koswena munsi-munsi we kucita kuti ubonesesye."

Mbukakatii ndaswena, kakataninga akuyeeya, "Jwii!" Cajata cipanela. Kwakaba kumuka, impemo yoonse yakana kamuzomvu yakabbila myoo mukanwa lyaciwena. "He-he-he-eee. Sunu masiku ulicilyo caciwena," wakaamba akusekelezya cakweena cikwaangala mbuli mbwaakali kuyaabuuluka kajokela.

Kwakali pipili-pipili ankomwe yamulonga. Kana kamuzomvu kakalizunza akutalika kudaanyana kukwela. Basikale bakati, "Wakalilekelela wakawa." Kakazyata akuzyata alimwi akukwela mbuli mpoceela pesi awalo ciwena wakalipopojane uuzyamizide.

Akaambo kakukwelana ooku, impemo yakana kana kamuzomvu limwi yakatalika kuyaa kulampuluka. "Gwala!" Kakaliwidooko kutozya camusana kana kamuzomvu.

Akaambo kakusupukwa cakulya ceelede kuti ncamasiku, ciwena wakanyema mpoonya wakanjila mumeenda.

Inga kuti kana kamuzomvu kakalange akalimpemo yako, nkujana yalampuluka. Kakaalilwa akwiibona nkuyayakali kugolela mpemo.

Impemo yakalampa citaambiki cakuti kakalikucikozya kucela micelo ilimujulu kumpeleengwa azisamu.

Kulampa nkwampemo eeyi kwakapa kuti kakacikozya akululikupila meenda kumusana. Eelyo kuzwa lyeelo, mizomvu zili ampemo zilamfu.