Izuba lyakabala kapati Cilimo eeco. Mucisaka mwakayuma.
Kanyenyene tiikakajisi meenda kwamazuba manji.
"Ndiyanda dosi lyameenda naanka kuti lyandilokela buyo kupepe," wakaamba Kanyenyene.
Ono amume buyo wakaliyumide.
"Naa nsejisi meenda ndilafwa," wakoompolola Kanyenyene. "Ndeelede kuya kumulonga ngondakamvwa."
"Mulonga wazula alimwi ulaanguzu. Ulakutola," mbwaakakacenjezya Lukobo.
Pele Kanyenyene kakalaanyota kapati. "Ndilafwa naa ntanywi meenda." Aboobo wakajoka kuyakuyandaula mulonga.
Wakainda mubwizu bwakazambene aatalaamitabi yakayumide.
Wakeenda limwi wakamvwa meenda asansa. Ooyu wakali mulonga. Wakaamvwa mayuwe aameenda.
Kanyenyene kakamena nkudyu yameenda atontola.
Kakakkomana kapati cakuti kunyina nokakabona yuwe nkolyalikuboola.
Kanyenyene wakasola kujatilila kubwizu bwakali kwiimpauka, kabwiinda awo mpokakabede. Pesi kakapyeelwa ameenda.
"Amundigwasye! Amundigwasye!" Kanyenyene kakaita.
"Fwambaana, tanta awa," mboyakaamba Nziba kaijisi katabi kumulomo.
"Ndilakkala aano kutegwa ndilumbe Nziba." Kanyenyene kakayeeya. "Ndilalindila kusikkila iboole kuzikunywa meenda."
Buzuba bumwi kakalindila, kwakaboola basankwa bobilo kumulonga. Basankwa aaba bakajisi malekani.
"Kuli nziba mpati ituba iboola kunywa meenda," mbwaakaamba musankwa umwi. "Njotutiilalile masiku asunu."
"Nsekwe kulekela basankwa kujaya Nziba iituba," mbokakayeeya Kanyenyene. "Ono ndaceyesya. Inga ndacita buti?"
Ndilyona buyo, Nziba iituba yakaboola ansi kuzwa mumusamu kutegwa inywe meenda.
Kanyenyene kakayeeya cakucita.
Kakasotokela acituta camusankwa omwe. Kanyenyene kakaluma musankwa uulya acanguzu.
Musankwa uulya wakasotoka. Mpoona wakoomba kati, "Acuu!"
Ilya Nziba yakanyongana mpoona yakauluka. Mboyakafwutuka oobo.
Mbombuboobo Kanyenyene mbokaalumba Nziba akukafwutula nkoyakakafwula.