Akaana Ka Nsofu Akaleeipusha-Ipusha
Judith Baker
Wiehan de Jager
IciBemba

Abantu bonse baalishiba ukuti Insofu yaalikwata umoona uutali.

1

Leelo kale saana, umoona wansofu waali uwipi kabili uwaina, ngoolusapato pakati ka cinso caiko.

2

Bushiku bumo, kwafyelwe akaana kansofu. Kaleeipusha-ipusha pa cintu icili conse. 
Kaleeipusha inama iili yonse.

3

Kaali nameepusho pa Ndyabuluba. "Cinshi wakwatila umukoshi uutali?" efyo kaipwishe.

4

Kaali nameepusho pa Cipembele. "Mulandunshi isengo lyobe lyatwiila?"

5

Kaali nameepusho pa Mfubu. "Cinshi wakwatila amenso ayakashika?" efyo kaipwishe.

6

Kaali nameepusho ayeengi pa Ng'wena. "Bushe Ng'wena ilya cinshi ubushiku?" efyo kaipwishe.

7

"Wikeepushapo ilipusho ngeelyo!" efyatiile banyina. Akaana kansofu kalimine kaya, ninshi naakafulwa.

8

Tapakokwele, mwankole yaalipupwike panshi yafika napakana kansofu. "Tiye unkonke kumumana. Kulya walaamona ico ing'wena ilya ubushiku," efyatile mwankole.

9

Efyo akaana kansofu kakonkele mwankole kumumana.

10

Kapitile mucaani nookwiminina mumbali yamumana. Kaloleeshe mumenshi. Ing'wena ili kwi?

11

"Shaani," efyalandile ilibwe mumbali yamumana. "Shaani" efya landile akaana ka nsofu. "Kuti wanjeba ico ing'wena ilya ubushiku?" efyo kaipwishe.

12

"Kontama panshi nalaakweeba," efyalandile ilibwe. "Selela mupeepi-peepi," efyasosele ilibwe. Akana kansofu kaselele panshi napanshi.

13

"Nka!" umoona wakaana ka Nsofu waiketwe mukanwa ka Ng'wena. "Ing'wena ileelya iwe ubushiku," efyasosele mwankole nookupupuka apupuka.

14

Akaana ka Nsofu kaikeele pamoolu yakako ayakosa, kaleetiinta. Kaalitintile, kabili kaalitintile. Leelo ing'wena tayalekeleko umoona wa kaana ka Nsofu.

15

Umoona wa kaana kansofu waalitiintike kabili waalitiintike. "Fulukutu!" efyo akaana ka Nsofu kaaponene icanuma.

16

Ing'wena yalubile na mumenshi. Yaaliifulwa pakupusumuna ifyakulya.

17

Akaana ka Nsofu kaloleeshe umoona wakako. Umoona waalitintika kabili waalileepa saana. Kaalifilwa ukumona apo umoona waapelele.

18

Umoona waalileepele saana icakuti akaana ka Nsofu kaleesaba neefisabo kumisambo iitali.

19

Umoona waakako waalileepele icakuti kaleeisamba pamusana namenshi. Ukutula apo, insofu shonse shalikwata umoona uutali.

20
You are free to download, copy, translate or adapt this story and use the illustrations as long as you attribute in the following way:
Akaana Ka Nsofu Akaleeipusha-Ipusha
Author - Judith Baker, Lorato Trok
Translation - Eunice Mukonde-Mulenga
Illustration - Wiehan de Jager
Language - IciBemba
Level - First paragraphs
© African Storybook Initiative 2014
Creative Commons: Attribution 4.0
Source www.africanstorybook.org
Original source