Kale-kale phukha dzo vha dzi sina milenzhe. Dzo vha dzi tshi to kokovha fhasi.

Vhathu vhone vho vha vhe na milenzhe, ngauri Maguru o vha fha milenzhe.

Liṅwe ḓuvha Maguru a dzudzanya u fha phukha milenzhe. A tshimbila u mona na muvhundu a tshi khou ḓivhadza nga khudzaipfi. U khou ṱoḓa phukha dzi tshi tshimbila sa vhathu.

Phukha dzo takalela u pfa uri dzi ḓo fhiwa milenzhe. Phukha iṅwe na iṅwe yo vha i khou ṱoḓa u vha na milenzhe uri i kone u tshimbila na u gidima. Dza imba dza dzungudza mitshila na u ṱharamudza phapha.

Phukha dza kuvhangana dza amba nga vhukonḓi ha u kokovha. Mavu na matombo zwi hwaya thumbu musi zwi tshi kokovha. Milenzhe i ḓo thusa uri zwi ime zwi vhone kule sa zwine vhathu vha itisa zwone.

Musi tshifhinga tsho swika phukha dza kokovha dza ya nḓuni ya Maguru u wana milenzhe. Thudwa ndau, mbila, nngweṋa na zwiṋoni zwa rwa muduba uri zwi ṋeiwe milenzhe.

Phukha dza fhiwa milenzhe mina. Zwiṋoni zwa fhiwa milenzhe mivhili.

Phukha dza vhonala dzi na milenzhe yo fhambanaho. Dziṅwe dza tshina nga dakalo. Dziṅwe dza konḓelwa u tshimbila dza ita na wa.

Dza tshimbila u mona na muvhundu u sumbedza vhathu. Phukha dzoṱhe dza ri, "A ri tsha dovha ra kokovha."

Phukha ya u fhedzisela kha muduba yo vha ḓongololo. Maguru a vhudzisa, "Hu tshe na muṅwe nga murahu hanu?" "Hai, Ndi nṋe wa u fhedzisela," ḓongololo ḽa fhindila.

Maguru a elekanya, "Arali hu si tshe na muṅwe ndi ḓo ita mini nga milenzhe yo salaho?"  Maguru a ṋea ḓongololo milenzhe yothe yo salaho.

Ḓongololo ḽa ṱuwa ḽo takala vhukuma ngauri ḽi na milenzhe minzhi. "Ndi ḓo tshimbila nga u ṱavhanya u vha fhira vhoṱhe," ḽo elekanya nga u ralo.

Ḓongololo ḽi tshi tou ṱuwa Ṋowa ya bvelela nḓuni ya Maguru. "Maguru mphenivho milenzhe" ndi khou tou luvhelela.

"Milenzhe ndo ṋea yothe yo fhelela." No vha ni ngafhi. Maguru u a vhudzisa. "Ndo rongomelwa," hu fhindula Ṋowa.

Maguru a lavhelesa ngomu nḓuni arali hu na milenzhe yo salaho. A si wane na muthihi.

Maguru a bvela nnḓa ari, "Pfarelo, Ṋowa, a hu na milenzhe yo salaho." Ṋowa ya fanela u kokovha i tshi humela hayani i si na milenzhe. U bva ḽeneḽo ḓuvha Ṋowa a i eḓelesi. I khou lindela tshiṅwe tshikhala tsha u wana milenzhe.