Kale kale hovha hu na khosi i no pfi Kayanja. O vha a tshi dzula pfamoni na muṱanuni na ṅwananyana, mukololo Apenyo. Mukololo Apenyo o vha e musidzana muṱuku wa lunako lwe munna muṅwe na muṅwe a tama u mu mala. Fhedzi Thovhele Kajanja o vha a khou ṱoḓa mamalo a ḓuraho vhukuma.

Tsini na pfamo ya Thovhele Kayanja ho vha hu tshi dzula iṅwe khosi I no pfi Aluda Muhulu. O vhidzwa Muhulu ngauri vhahura vhoṱhe vho vha vha tshi mu thetshelesa. O vha a tshi halifhela muṅwe, na muṅwe a sa mu thetshelesiho. Muṱanuni wa khosi Aludah o vha o lovha nga maḽaria nahone o vha a tshi ṱoḓa muṅwe muṱanuni.

Zwenezwo khosi iyo ya u khwaṱha yo no vhaho ya maḓuvha ya ya ha thovhele Kayanja u mala Mukololo. Vha kha nyamedzano ya mutengo vha pfiwa nga muthusi Kakembo, o vha e tsinisa na mukololo Apenyo.

Khosi Aludah a tenda uri u ḓo ṋea thovhele hafu ya lupfumo lwawe khathihi na ṋeleṱe i re tshipiḓa tsha lumalo. Nzudzanyo dza mbingano vhukati ha khosi Aludah na mukololo Apenyo dza itwa lwa tshiphiri. Thovhele o vha a tshi zwi ḓivha uri ṅwananyana wawe ha nga takaleli uyo muhumbulo.

Ho sala vhege nthihi uri mbingano i vhe hone, mufumakadzi Kakembo a kwamana na Apenyo. "Mukololo wanga, Khotsi aṋu vho dzudzanya mbingano yaṋu na Khosi Aludah. Mbingano i ḓo vha hone mafheloni a vhege nthihi." O no ralo ndi Kakembo.

Apenyo a mangala a si ḓivhe uri a ite mini. Zwenezwo a humbula uri ha nga vhingwi nga khosi Aludah, heneiḽa khosi ya u khwaṱha nahone ya mukalaha. Ndi fanela u ṱavhanya nda wana nḓila ya u ya ha Trevor ndi saathu u lenga. Trevor o vha e mufunwa wa mukololo Apenyo.

Vhusiku honoho Apenyo a kokovha a bva pfamoni. Arali khotsi awe vha zwi tumbula uri u khou ya ngafhi vho vha vha tshi ḓo sinyuwa. A gidima a bva nga vhukati ha ḓaka ḽo pinzanaho nṱha ha matombo na mipfa u swika a tshi swika ha Trevor wawe. A tshi swika nḓuni ya Trevor o vha o neta e na nḓala na ḓora.

"Mufunwa wanga, ndi ngani no gidima lwendo lungafha ni noṱhe vhusiku vhungafha?" Trevor u a vhudzisa, a mu fha maḓi uri a nwe a awele. Trevor ha ngo dzulisea a sa athu pfa zwa haṋwani ha Apenyo.

"Thaidzo yaṋu ndi mini mufunwa wanga wa mukololo." Apenyo a femela nṱha o dinalea. "Khotsi anga vha khou mmalisa nga khosi Aludah Muhulwane. Fhedzi ndi nga si malwe nga houḽa muthu wa khakhathi. Trevor, ndi ṱoḓa u malwa nga inwi naho ni tshisiwana. Ndo ḓi imisela u tambula. Ndi a ni funa."

"Fhedzi mukololo a thi na ndaka i linganaho u ni mala. Ndi mutukana wa tshisiwana." Trevor u ralo a lila. Apenyo a tshi fhindula ari, "Ndi a zwi ḓivha, fhedzi ndi inwi fhedzi ane a nga mmala." A elekanya tshifhinga nyana a ri, "Kha ri ye kha Kategga munna wa tshikwekwethe uri a ri welise ri wele seli na lula lwa mulambo. Nga heyo ndila hu ḓo vha u ponyoka nahone khotsi anga vha si ri wane."

Ngeno murahu pfamoni zwa wanala uri mukololo Apenyo o ngalangala ha laedzwa vhashumeli uri vha mu londe hoṱhe afho muvhunduni. Vhalindi vha thovhele na muthu muṅwe na muṅwe vha ya vha ṱoḓa fhedzi mukololo Apenyo a si wanale. Vha vhuisa muvhigo kha thovhele wa uri mukololo Apenyo ha ngo wanala. "Iyani ni ṱoḓe na ḓakani." Thovhele Kayanja a ṋea ndaela. O vha o dinalea vhukuma.

Zwenezwi mukololo Apenyo na Trevor vha tshi tou swika khunzikhunzini dza mulambo ha vhonala makole matswu a tshi kuvhangana. Ha pfala mvula ya madumbu i tshi khou ḓa.

Kategga mune wa ngalavha o vha a tshi khou tshi vhofha musi avha vhavhili vha tshi bvelela. Trevor a humbela Kategga uri a vha wedze seli nga ngalavha. Kategga ha ngo ṱanganedza khumbelo, o ṱalutshedza uri hu khou ḓa mvula na maḓumbu nahone i ḓo vha khombo nga maanda.

Trevor a kombetshedza a ṱalutshedza Kategga uri ndi ngani vha tshi tea u wela. A dzhenisa tshanḓa tshikwamani a bvisa mbadelo ya khumba a fha Kategga. Musi Kategga o pfa mafhungo avho na u vhona gwangwa ḽa khumba ḽo nakaho a vha pfela vhuṱungu. A tenda u vha wedza naho mutsho wo vhifha nga u tou ralo.

Kategga a kokodzela ngalavha maḓini. A vha vhudza uri vha ṋamele. A dzhia thanda dza u talisa ngalavha a thoma u tala. Thovhele Kayanja na khosi Aluda vha tshi swika khunzikhunzini vha vhona vhathu vhararu vhe kha ngalavha vha mbo ḓi zwi humbula uri vhafunani vhatuku vho shavha.

Mvula ya maḓumbu ya thoma u na ya kanganyisa ngalavha lwe Kategga a balelwa mu tshi langa. Thovhele Kayanja a vhidzelela Apenyo uri a vhuye o mu hangwela ha nga vha iti tshithu ene na Trevor. Fhedzi vho vha vho no lenga. Ngalavha ya tekulwa vhala vhathu vhararu vha poselwa maḓini o halifhaho vhoṱhe vha nupela. U bva lenelo ḓuvha kha muvhuso wa Thovhele kayanja vhathu vho mbo ḓi tendelwa u mala ane vha funa, o pfuma kana e tshisiwana.