Faŋa faŋa to, pɛ-fɔrɔ daama mo wora ba na bwoi-o we Kayanja to. O de o kaane de ba bukɔ ba na bwoi-o we Apenyo to mo zoora. Pɛ bukɔ Apenyo deem laama mo dedɛ pa se baara na nɛ-o ba lage o se ba swo. Amaa pɛ-faro Kayanja lage kwora dedɛ mo o bukɔ wom kwaga ne.

Pɛ-fɔrɔ Kayanja zoore o twɛ de pɛ dedɛɛro wolo ba nấ bwoi-o Aludah to sɔŋɔ mo. Ba bwoi o "Dedɛɛro" bɛŋwaane nɔɔna maama kateire dem ne pa-o zula mo. (O jege jara dedaane nɔɔna balo na ba pa-o zula to mo!) Paa ma go pɛ Aludah kaane pa se o lage kaane se o da swo.

Pɛ nankwia kam wom ma vu pɛ-faro Kayanja tei se o cha o bukɔ wom de kwora. Pwa balei bam na wora ba bwɛ bukɔ wom kwaga kwora yam to kan-nyaane wolo ba na bwoi we Kakembo to ni ba lara yam. Kakembo de pɛ bukɔ Apenyo ye balo na twe daane to mo.

Pɛ Aludah maa sɛ se o chɛ o jejegero tem chechworo o pa pɛ-faro Kayanja se ko ta ye o bukɔ wom ka-kwɛɛro, garelwei de ye ka-kwɛɛro tem wo woŋo dedoa mo. Ba dɛɛm jaane se ba ke kadiri dem ba pa pɛ Aludah de pɛ bukɔ Apenyo mo, ye ba wo pɛ se ko nwoŋi pwoni. Pɛ-fɔrɔ kom yei we o bukɔ wom wo bấ pwoli de ba na jaane tei to.

Ko na dare dayare pɛ se kadiri dem ke to mo kan-nyaane Kakembo yi Apenyo tei. "A pɛ bukɔ swone, n kwo ti o yiga se o swo-m o pa pɛ Aludah mo dayarepɛ wɛɛne." Kakembo taga de pâ bukô.

Taane dem so pɛ bukɔ Apenyo pa se o yeiri o na wo ke kolo. O maa boŋe o we, "A ba zo pɛ nankwea kanto. Ko ba ke! A jege se a ke lela mo a vu Trevor tei se o ni kolo o na wo ke to."  Trevor dɛɛm ye pɛ bukɔ Apenyo bɔɔlo mo.

Titi dem ne pɛ bukɔ Apenyo seige ma o nuŋi o kwo sɔŋɔ ne. O kwo nấ lɔre o na maa vei m o bane wo zaŋe dedɛ de o. O duri o tɔge teene kɔgɔ de peiro de kalantua wone mo o vu o yi o bɔɔlo Trevor sɔŋɔ. O na yi o bɔɔlo wom sɔŋɔ to, buga, kana de nanyɔne mo nege-o dedɛ.

"A bɔɔlo, bɛ mo pa se n duri chɔn-dedoro konto n yerane, ko ma ye titi de n beene a tei?" Trevor mo bwei. O ma mo na-nyɔɔra o pa-o ye o dare o pa se o si. Trevor laam wowole mo ye o cheige Apenyo se o ta taane.

"A pɛ bukɔ swoon, bɛ mo daane-m?" Trevor bwei. Apenyo ma si dedɛ ye o ta de wo-chechoko o we, "A kwo mo lage se o swo ne o pa pɛ Aludah. Amaa a bấ zo ba-lwaro wonto doŋe. Trevor, a lage se a zo nmo mo de n na yiniga tu de. A sɛ se a yaare. A swo-m."

"Pɛ bukɔ a ba jege kolokolo se a pa n kwaga kwora, nmo yei we a ye yinigatu mo." Trevor ma kaase! Apenyo ma leire o we, "A yei, amaa nmo mo a lage se a zo." O ma boŋe fee ye ta we, "Pa se de vu, Kategga na-bworo kom tu tei se o ja debam o bɛ buga kam. De na ke konto de wo siege pa se a kwo daa ba na debam."

Pɛ-faro Kayanja na mane we Apenyo teire o sɔŋɔ ne to o pɛ se ba nuŋi mo ba beere o jei tio kom maama ne. Pɛ wom gabɛ, de o swoja, de nɔɔn-maama beere jei sem maama mo tio kom ne ye ba wo nɛ pɛ bukɔ Apenyo. Ba ma jwoori ba vu pɛ-fɔrɔ wom tei ba ta de do ba na wo nɛ Apenyo tei to. "Nam vei na gao wone ấ beere o jei," pɛ-fɔrɔ Kayanja pɛ wadaa. O bane mo zaŋe dedɛ.

Pɛ bukɔ Apenyo de Trevor na ke lela ba yi buga kam ni to, dua bobo tinim pa se vu-fɔrɔ zaŋe.

Kategga, na-bworo tu wom yaa wora o lae o boro kom mo ye bɔɔla bam yi o tei. Trevor maa lwoori Kategga se o kwe ba o bɛ buga bubɛ. Kategga maa wό sɛ ye o we vio-fɔrɔ lage se ko zaŋe mo, ko maa ba lamma.

Trevor maa maŋe o bere Kategga kolo na pa se ba lage se ba bɛ to. O ma tore o garofɛɛle ne o li sabu-pwoŋa o pa Ketegga. Kategga na nigi taane dem to ye o na sabu-pwoŋa kam to, o wo chɔge dedɛ. O ma sɛ se o bɛ ba de vio kom na wora to de.

Kategga ma vaŋe na-bworo kom o twɛ bubɛ ye o pa se ba zo. O laam ma kwei bworo kom daa o bobo veŋa. Pɛ-fɔrɔ Kayanja de pɛ Aludah na yi buga kam ni to ba nɛ nɔɔna batɔ na wo bworo kom wone. Ba lware we bɔɔla balei bam luga.

Vu-fɔrɔ a maŋe na-bworo kom. Kategga maa ga se o ja ko. Pɛ-fɔrɔ Kayanja tɔɔle o we, "Apenyo a lwoore ấ bam jwori na ấ ba! A yage nmo de Trevor lɔrem a chɛ a bam."  Amaa ko nam kɛ. Na-bworo kom ma lwo ba na-luŋa kam wone. Ba maama maa maŋe na bam wone. Ko zege dento dɛ dem ne, nɔɔna balo na wo pɛ-faro Kanyanja kateire dem ne to laam wae ba swo wole ba na lage to, sabutu naa yiniga tu.