Ho vha hu na muṱa wo shayaho. Vhe na ṅwana muthihi a tshi pfi Nonkungu. Vho vha vha tshi mu funa nga maanda. Musi o no aluwa vhabebi vhawe vha humbula uri ndi khwiṋe vha mu ise u dzula na malume wawe vha mupfumi. Vha no pfi Vho-Mtonyama. Mme awe vha mu rungela zwiambaro zwo khetheaho zwi re na lubannda, gunubu na malungu. Vha ita na tsha u ambara mukuloni tsho nakaho vhukuma. Nonkungu a takuwa o livha ha malume wawe.

Nonkungu e nḓilani a swika kudamboni. A wela kudambo a ṱangana na musidzana o ambara malakanṱana. Musidzana a vhudzisa "Ni khou ya ngafhi?" "Ndi khou ya ya u dalela malume anga Vho-Mtonyama." Nonkungu u a fhindula. "Ndi zwone na nṋe ndi malume anga! Na nṋe ndi nḓilani ya u ya u vha dalela." We a ralo ndi hoyu musidzana. Ngauralo vha tshimbila vhoṱhe. Nga murahu ha tshifhinga musidzana a ri kha Nonkungu, "Zwifuko zwanu na vhulungu hanu zwo naka nga maanḓa. Ndi humbela u lingedza u ambara."

Nonkungu u bvula zwifuko zwawe a ṋekedza uḽa musidzana. Musidzana a tshi bvula zwifuko, Nonkungu a vhona uri uḽa musidzana u na mutshila. Nonkungu a ofha. Ambo di zwi limuwa uri uḽa musidzana ndi mbulu. Vho no tshimbila nyana Nonkungu a ri, "Ndi khou humbela u fhiwa zwifuko na vhulungu hanga murahu."

Mbulu ya fhindula ya ri, "Imani ndi ḓo ni fha ri tshi swika kha muri u tevhelaho." A sumba muri u re kha tshikwara tshi re phanḓa. Vha tshi swika kha ula muri, Nonkungu a humbela uri mbulu i mu fhe zwifuko na malungu awe. "Litshani ndi zwi ambare u swika tsimuni," i no ralo ndi mbulu. Ya sumba tsimu i re kha tshikwara tshi tevhelaho. Nonkungu nga u ofha mbulu a tenda.

Vha swika tsimuni. Nonkungu a humbela uri mbulu i mu fhe zwifuko na malungu awe. "Litshani ndi zwi ambare u swika fhala nḓuni ho dzulaho vhafumakadzi." Mbulu yo ralo i tshi sumba nnḓu i re ngei phanḓa. Vha bvela phanḓa na lwendo. Vha tshi swika tsini na nnḓu mbulu ya sukumedzela Nonkungu murahu yone ya gidimela phanḓa.

Mbulu ya ri kha vhafumakadzi vha re afha nḓuni, Lavhelesani uyu musidzana o ambaraho mathatha. O ntevhela ḓuvha ḽoṱhe. Ndi tama o vha a tshi nga ṱutshela kule. Vhafumakadzi vha rembuluwa vha sedza Nonkungu. Ene a ofha, a shavha a dzumbama dangani. Mbulu ya ṱuwa ya livha ha malume Vho-Mtonyama. Ya amba nga ipfi lavhuḓi ya ri, "Ndi muduhulu wavho Nonkungu. Vhabebi vhanga vho nthuma uri ndi ḓe ndi dzule navho."

Vho-Mtonyama na muṱa wavho vha tanganedza uyu musidzana. Vha mu fara zwavhuḓi. Nonkungu wa vhathu a lala dangani nahone a kovhekana zwiḽiwa na mmbwa. Masiari o vha a tshi dzumbama tsimuni a imba luimbo. "Maṱungu nṋe, Maṱungu nṋe. Ndo rumiwa nga khotsi na mme anga u dzula na malume anga Vho-Mtonyama. Nḓilani nda tangana na mbulu ya nnzhiela tshikete na vhulungu. Maṱungu nṋe, Maṱungu nṋe."

Liṅwe ḓuvha murwa wa tanzhe wa Vho-Mtonyama o vha a khou tshimbila tsimuni. A pfa ipfi lisili ḽi tshi imba ḽo sinyuwa. A si ḓivhe uri ndi nnyi a imbaho. Fhedzi a tshi swika ha khotsi awe a vha vhudza maipfi a luimbo. Vho-Mtonyama vha ya tsimuni. Vha pfa luya luimbo vha ṱoḓa u swika vha tshi wana Nonkungu.

Nonkungulu a ṱalutshedza malume zwoṱhe zwo bvelelaho. Vho-Mtonyama vha ṱuwa nae vha swika vha mu dzumba kha iṅwe nndu. Vho vha ha tshi ḓivha uri vha ḓo ita mini u fara mbulu. Vho-Mtonyama vho vha vho pfa u pfi mutshila wa mbulu u funesa mafhi lune mbulu i nga si fhire hu re na mafhi i songo nwa. Vho-Mtonyama vha vhudza vhanna vhavho uri vha bwe dindi, vha ḽi ḓadze nga mafhi o vhilaho.

Vho-Mtonyama vha ramba vhasidzana vhoṱhe vha afho muvhunḓuni u dzhenelela muṱatisano wa u fhufha. Mbulu ya vhilaela. A yo ngo zwi funa u fhufha dindi nga nṱha. Mbulu yo zwi ḓivha uri mutshila wayo u ḓo pfa ḓora ḽa mafhi o vhilaho. Ya dzhena nḓuni ya vhofhelela mutshila kha muvhili wayo. Ya khwathisa. Ya kona u ya ya dzula na vhaṅwe vhasidzana.

Vha fhufha nṱha ha dindi ḽi re na mafhi o vhilaho nga u sielisana. Wa u fhedzisela a vha yone Mbulu. Ya lingedza u fhufhesa uri i ye nṱha vhukuma ha dindi ḽa mafhi, fhedzi mutshila wa vhofholowa. Mutshila wa mbulu wa i kokodzea mbulu fhasi kha dindi ḽa mafhi o vhilaho.

Zwenezwi mbulu i tshi khou takanyela, vhanna vha ṱavhanya vha ḓadza dindi nga muṱavha. Ha vha u vhulungwa ha mbulu. Nonkungulu a dzula na malume wawe o takala lwa tshifhinga tshilapfu.