Kgalekgale go be go na le monna yoo a bego a na le ntho ye šoro mo leotong la gagwe. O be a sa kgone go ema goba go sepela. Monna yo o be a dula motsemagaeng le mosadi wa gagwe le bana.

Monna yo le mosadi wa gagwe ba be ba na le bana ba bararo ba bašemane le mosetsana o tee. Leina la mosetsana e be e le Nangila. Mošomo wa mosetsana yoo e be e le go hlokomela tatagwe. Bašemane bona ba be ba šoma kua tšhemong le go diša diruiwa.

Nangila e be e le mosetsana yo mobotse. Badudi ba mo motseng ka moka ba be ba mo rata le go mo hlompha. Batswadi ba gagwe ba be ba rata gore Nangila a be le molekane wa maleba. Ba ileba tla ka leano le boima la go hwetša monna wa maleba wa Nangila.

Yoo a ratago go nyala Nangila o be a swanetše go hwetša sehlare go tšwa go letsha leo le lego kgauswi le motse. Sehlare seo ke sona se tla fodišago ntho ya tatago Nangila. Efela letsha leo le be le tletše ka meoya ke kotse kudu.

Banna ba bangwe ba ile ba iteka mahlatse efela ba boa ba sa hwetša sehlare seo. Ba bangwe ba banna ba ile ba ja ke bjelele gona letsheng leo.

Nangila o ile a kwa a belaetšwa ke seemo seo. Le dikgaetšedi tša gagwe ba be ba sa rate go ya fao letsheng. O ile a tšea sephetho sa go yo tšea sehlare seo ka boyena. Mmagwe o ilea re, "Ngwanaka, ge banna ba bogale ba paletšwe, na wena o tla kgona?" Efela Nangila o be a feditše le monagano.

Ge a le tseleng ya go ya letsheng, Nangila o ile a kopana le mokgekolo a rwele dikgong. O ile a thuša mokgekolo yoo ka go mo rwalela dikgong tšeo. Mokgekolo o ile a leboga gomme a re go Nangila, "Ke tla go botša go re na o ka fihla bjang kua letsheng la meoya le go re o dire eng ge o fihla gona."

Ge a fihla lebopong la letsha, Nangila o ile a bona lapa leo la moya ba enwa le go bina. O ile a ema a leta. Kao tee kao tee lapa lela la moya ba ile ba swarwa ke boroko.

Ge meoya yela ka moka e robetše, Nangila o ile a fofela ka gare ga letsha. O ile a hwetša sehlare sela gomme a se lokela ka gare ga mokotla wa gagwe. Ge a sesa a boela morago lebopong, maphoto a be a goletše godimo a mo dikologile.

Ge Nangila a fihla lebopong, meoya yela e be e šetše e tsogile. O be a tšhogile, fela a opela koša yeo mokgekolo yola a mo rutilego yona: Nna, morwedi wa Wekesa, Ke tšwa letsheng. Ke tlile ka baka la go re banna ba tšhaba go tla. Tate o hloka sehlare se, gore se mo fodiše ntho. Ke ka lebaka leo ke lego mo, Mo nageng yeo ba bantši ba tšhabago go fihla, Ka lebaka la go re lena le babuši.

Lentšu la Nangila le le bosana le ile la tsikinya meoya yela gomme ba mo kgopela gore a ba opelele gape le gape. Moopelo wa gagwe o ile wa dira gore meoya yela e swarwe ke boroko gape. Nangila o ile a kgona go phonyokga gomme a kitima ka lebelo la mmutla go fihla motseng wa gabo.

Batho ba motse ba be ba mo letile ka tetelo ye kgolo. Morago ga go fodiša ntho ya gagwe ka sehlare sela, tatago Nangila o ile a kgona go ema gape ka maoto a mabedi. Setšhaba ka moka se ile sa thabela Nangila ka go bina le ditheto.