Kgalekgale go be go na le monna yo mongwe le mosadi wa gagwe bao ba bego ba itopela tša fase. Ba be ba nale ngwana yo mo tee fela yoo a bego a bitšwa Nonkungu. Ba be ba mo rata kudu. Erile Nonkungu a godile, batswadi ba gagwe ba tšea sephetho sa go re a ye go dula le malome wa gagwe wa mohumi yoo a bitšwago Mtonyama. Mmago Nonkungu o ile a mo rokela diaparo tša go ikgetha tša goba le ribone, dikonopi le dipheta. O ile a mo direla gape le sefaga se se botse. Nonkungu o ile a tloga a leba motseng moo malome wa gagwe a dulago.

Leetong la gagwe, Nonkungu o ile a fihla moeding. O ile a tshela moedi gomme a kopana le mosetsana yo a aperego mankgeretla. Mosetsana yoo a mmotšiša a re, "Naa o ya kae?" "Ke ya go etela malome Mtonyama," Nonkungu a fetola. "Aowi, Mtonyama ke malome waka le nna! Ke tseleng ya go mo etela le nna," mosetsana a realo. Basetsana ba ile ba swarišana tsela. Morago ga sebakanyana, mosetsana o ilea re, "Diaparo tša gago le sefaka ke tše di botse. Ke kgopela o ntumelele ke itshwanetše?"

Nonkungu o ile a apola diaparo tša gagwe a di fa mosetsana. Ge mosetsana a apola mankgeretla a gagwe, Nonkungu a lemoga go re mosetsana yoo o na le mosela. Nonkungu o ile a tšhoga. A lemoga go re mosetsana yoo ke imbulu. Ba ile ba iša pele ka leeto gomme Nonkungu a re, "Ke kgopela o mphe diaparo le dipheta tšaka."

Imbulu ya fetola ka go re, "E re ke di apare go fihla mohlareng wola o latelago." A šupa mohlare woo o bego o le thabaneng ya kgauswi. Ge ba fihla moo mohlareng, Nonkungu a kgopela imbulu a re, "Ke kgopela o mphe diaparo tša ka le dipheta." "E re ke diapare go fihla lebaleng lela," imbulu ya realo. A šupa lebala leo le lego kgauswi le thabana yeo e latelago. Nonkungu o be a tšhogile, ka gona a dumela.

Mafelelong ba ile ba fihla moo lebaleng. Nonguku a kgopela imbulu gape, "Ke kgopela o mphe diaparo tšaka le dipheta." "E re ke be ke diapere ke tla go fa ge re fihla kua ntlong yela basadi ba dutšego gona," imbulu ya realo. A šupa ntlo yeo e bego e sa le kgojana. Ka fao ba tšwelapele ba sepela. Ge ba fihla kgauswi le ntlo yela, imbulu ya kgoromeletša Nonkungu kua morago gomme ya kitimela pele.

Imbulu ya re go basadi bale moo ntlong, "Bonang mosetsana yo wa go apara mankgeretla. Ga e sa le a ntšhetše morago letšatši ka moka. O ka re a ka nkatoga." Basadi ba ile ba retologa, ba lebelela Nonkungu. Yena o be a tšhogile moo a ilego a kitima gomme a iphihla ka gare ga lešaka. Imbulu e ile ya fetela ga Malome Mtonyama. E ile ya bolela ka boleta ya re, "Ke nna motlogolo wa gago, Nonkungu. Batswadi baka ba nthometše mo go tlo dula le wena."

Mtonyama le ba lapa la gagwe ba ile ba amogela mosetsana yoo. Ba be ba mo swere gabotse. Nonkungu wa batho yena o ile a robala ka lešakeng a ba a ja dijo le dimpša. Mosegare o be a utama ka mašemong gomme a opela košana ye: "Ke a itshokolela, ke a itshokolela. Kerometšwe ke batswadi baka go tlo dula le Malome Mtonyama. Ge ke le tseleng ke kopane le imbulu gomme ya ntšeela sekhethe saka le dipheta. Ijoo! Ke a itshokolela, ke a itshokolela."

Ka letšatši le lengwe morwa wa Mtonyama yo mogolo o be a sepela ka mašemong. O ile a kwa košana ye ya semaka, ye bohloko. O be a sa tsebe gore e opelwa ke mang, efela ge a fihla gae, o ile a botša tatagwe mantšu a yona. Mtonyama o ile a ya ka mašemong. O ile a ikwela ka tša gagwe ditsebe gomme a nyaka go fihlela a hwetša Nonkungu.

Nonkungu o ile a hlalošetša malome wa gagwe ka moka tšeo di diregilego. Mtonyama o ile a mo tšea a ya le yena motseng a mo uta ka gare ga ntlo. O be a tseba gore o tlo dira eng go swara imbulu. Mtonyama o kwele gore mosela wa imbulu o rata maswi le go re o ka se fete maswi ntle le go a nwa. Ka fao ile a laela banna ba gagwe go epa molete gomme ba o tlatše ka maswi a go kgahla.

Mtonyama o ile a bitša basetsana ka moka ba motseng go tšea karolo phadišanong ya go tlola. Imbulu e be e belaetšwa ke se. E be e sa nyake go fofa molete. Imbulu e be e tseba gore mosela wa yona o tla nyorelwa maswi ao. E ile ya tsena ka ntlong gomme ya bofelela mosela wa yona ka maatla mmeleng. Morago e ile ya ya go tsenela phadišano le basetsana ba bangwe.

Basetsana ba ile ba tlola molete wa maswi a go kgahla ka go latelana. Mafelelong, e ile ya ba nako ya imbulu ya go tshela. E ile ya leka go tshela ka godimodimo ga molete, efela mosela wa yona wa bofologa. Mosela wa yona o ile wa e gogela fase, fase, fase ka gare ga maswi a go kgahla.

Ge imbulu e leka go ragaraga ka gare ga maswi, banna ba ile ba tlatša molete ka mobu ka pela gomme ba e boloka. Ya ba mafelelo a bophelo bja imbulu. Nonkungu o ile a dula ka lethabo le malome wa gagwe nako ye telele.