Go be go na le pese ye tee fela motseng wa bo Ebei. E be e le ye kgolo ya mmala wa talalerata. E be e na le modumo wa lešata kudu.

Ka letšatši le lengwe mmago Ebei o ile a re, "Gosasa re tla ya toropong go reka diaparo tša gago tša sekolo."

Ebei o be a thabile kudu. Ba be ba eya go sepela ka pese ye kgolo ye talalerata. Ebei o be a thabile kudu ebile a sa kgone go rabala bošegong bjoo.

Ebei o be a šetše a itokišitše ge mmagwe a eya go mo tsoša.

Ebei le mmagwe ba ile ba leba boemapese. Ba ile ba emela pese ye kgolo ya mmala wa talalerata. Efela pese e ila ya se tle.

Batho ba bangwe le bona ba ile ba fihla boemapese. Ba ile ba ngongorega ka ge pese e latetšwe. "Pese e kae?" ba botšiša.

Ebei o be a tshwenyegile. "Re ka se sa kgona go ya toropong. Nka se sa hwetša diaparo tše diswa tša sekolo," a nagana.

Batho ba bangwe ba ile ba itlhoboga gomme ba boela gae. Eupša Ebei o ile a lla a gana go boela gae. Mmagwe o ile a mo kgothatša. "Re tla leta sebakanyana," a realo.

Morago ga nakwana, ba ile ba kwa modumo. Ba ile ba bona lerole moyeng. E be e le pese e tšwelela!

Efela pese ye e be e se ye talalerata. E be e se ye kgolo. Pese e be e le ye hubedu le gona e le ye nnyane. Batho bao ba bego ba emetše pese ba ile ba lebelela pese ye. Ba ile ba se namele.

"Namelang! Namelang!" mootledi a goelela. "Nako e re šiile lehono," a realo.

Ebei le mmagwe e be e le bona ba mathomo ba go namela pese. Morago ga nakwana batho ba bangwe le bona ba namela pese yeo ye hubedu ye nnyane.

Ebei o ile a lebelela ka lefasetere. O ile a bona batho ba bantši gona moo boemapese.

Batho ba bantši ba ile ba kitima gore ba sware pese. Efela ba be ba šaletše. Pese e be e tletše. Pese ye hubedu e ile ya leba toropong.

"Na pese ya mmala wa talalerata, ye kgolo, e kae?" mmago Ebei a botšiša. "E senyegile," mootledi a fetola. "Re a e lokiša. E tla tla gosasa," a tlatša a realo.

Ebei yena o be a sa tshwenyege ka mmala wa pese. O be a sa tshwenyege ka bogolo bja pese. O be a thabetše fela gore pese ye e ya toropong.