Obwakare na kare Warujojo na Wakame bakaba bari abanywani Bakaba beine ekisyo ky' ente, entaama hamwe ne mbaraasi.

Bakaba bariisa amatungo gaabo omurushozi rwa Kiziba omuri Kamwenge. Obumwe nobumwe bakaba batwara amatungo gaabo omuruhaanga rwa Rukooko okusherurayo amaizi no bunyaasi oburungi.

Wakame na Warujojo bakaba bazaana omupiira bari omwirisizo. Eki kikaba kibashemeza munonga munonga.

Kwonka omukuzaana kwabo, Warujojo akaba asiinga Wakame kandi akaba amuteera za goolo nyingi munonga.

Eizooba rimwe Wakame akabuuza Warujojo "Nenki ekirikutuma wazaana gye munoonga?" Warujojo akamugarukamu ngu "Nahabwa amaguru gangye mahango."

Eizooba eryakuratiireho Wakame akagambira Warujojo ngu beirukye empaka. Warujojo atyo yeikiriza batandika okwiruka.

Wakame akasiinga empaka zokwiiruka zoona. Eki kikabiihiza Warujojo ahakuba akaba atuura nasiinga.  Mbwenu yabuuza Wakame ati "Ekyirikutuma weiruka munoonga nikyi?  Wakame yagarukamu ngu ni ahabw' buguru bwangye bukye."

Warujojo ahonaho yabuuza Wakame ngu nkorekyi okukyedeeza amaguru gangye.  Wakame yamugarukamu ati, "Kyanguhi munonga, ninza kukworeka okworakyendeeze amaguru gaawe n'omuriro."

Wakame akagambira Warujojo ngu ate amaguru ge omumuriro.  Warujojo atyo yaaza omumuriro yaribatamu. Atyo yatandika okuteera enduru mpango ati "aibambe! Ayii! Omuriro gwanyosya!"

Wakame akashemererwa munonga. Yaguma nagambira Warujojo ngu agumisirize amaguru ge gariyo nigakyendeera.

Warujojo akashasha munoonga atyo yaruga omumuriro nayajura nk'omwaana. Akaba atakubaasa n'okwemerera atyo y'abyaama   ahansi.

Warujojo akaguma ashutami ahansi okumara ebiro byingyi ahakuba akaba atarikubaasa kwemerera.

Warujojo akeimuka yataaha omuka owabo ahanyima y'ebiro bingyi.

Obwahati Wakame na Warujojo tibari banywani.