Document

Ŋgvəv wùn Ŋgom

Winny Asara

Magriet Brink

Ŋgvəv wùn Ŋgom-eè dzə̀ ŋkar si. Yii bèy, a wùn wun-eè rəsi din a dzə̀ wìr shaà wír.

Wìy lòo dzə e kishiíy kímóʼkí, wùn wun sìysì ji á té á bor, e yèn ó ji wìr wo wù kiìn té sà dzə̀ laá.

Áwune nèn dù e maàndzə visəə̀rí, e kèʼ a te bor.

Ŋgvəv wáa te cér cér, yii bèy, a Ŋgom té shaa wun.

Ŋgvəv té bor, wú du e gbù kwaʼda, Ŋgom té və́, wú shaà fó, e dù duùn fó mbìy.

Ŋgvəv nèn kèʼ a yu bír.

Áwune nèn sìysì ji á té lèn, a dzə̀ á wo wìr wáa te, é wùmòʼ wáa koo.

Á kèʼ té, Ŋgom nèn nə̀ə́ a koo. Ŋgvəv nèn wày bor e mòʼón cáʼ.

Ghán sé Ŋgvəv si nèn lò e ghèén se wù nəə́ sa, a koo bor.

Ŋgom té bor wó mbìyi, e wày wáyín.

Wù céŋér wúmóʼó, e nèn siì wày.

Wù fún wúmóʼó e kitú ki, e kù wày wáyín. Kù bey, kù bey, wù nèn fə̀mrì bor sitàn.

Kilòŋ kí nèn shwìíy Ŋgvəv shwiiyín ji á sò á wun. Vé-eè sò rú wun e dzəə ye biibí.

Ŋgom nèn lò a sheʼ kfə́ sheʼén, ji ŋkar rə sà shwìíy kee ben kee kilòŋ ji ka á?

Kinyo kìn ki nyár Ŋgvəv feyì, yì ŋaáŋé shuù bèn kijuŋ, e kù nèn mèy Ŋgom méyin.

Kù mo Ŋgvəv kfə́n e bàm fó laʼ, wùn yìy à Ŋgom tàrnén.

Yìy à Ŋgom dzə́r shó jii, “À yén wán wom á?” Ŋgvəv nén a tiy kisə́sə.

Yìy à Ŋgom nèn mèŋ kinyo kée yiì.

Yìy à Ŋgom nèn lò yù shijí, a shí tóŋ, yoŋ jii, “Kii wò, yè wor, ku sə̀ mo!”

Yìy à Ŋgom leéy virə́ʼ, e kaàrí, e tàr. Wù kfə̀n lì ghán, e yuùrí virə́ʼ kijuujùŋ, e nèn yù, a ji rə̀y wiy a dzə̀ fo Ŋgvəv bvə̀m.

Yìy à Ŋgom waámé kitávín jii, "Wan wòm, yúsí vitaáví vé vee jeéy ví."

Ŋgom dzə̀ bey, a dzə̀ yì fə̀ə́r kirəm ke bi kí. A dzə̀ yì kfə̀n yiì, kifá ki wàa koo e shuù kibiíbí. Á bèy Ŋgvəv nèn kù yù wún və́ a wú sì yàsí yàsí.

Ŋgvəv nèn a jwèrkìr jwèrkìn. Jwerkìr bèy, wù mèyrì shuu, e nèn cù.

Wù nèn kèʼ a shem, a kiisí. Kighiísí ki nèn lò e tàvkír tavkín.

Ŋgom-eè bìr mo kifá ki yii bìr bey.

Ŋgvəv ku kiìsí kiìsín bey, e dù, e meé mo yì kì woʼtin, e màʼ Ŋgom ye yì kì dzəə̀n e wun bvə̀m.

Yìy à Ŋgom wùn wan və ku nèn ŋàŋrì, e kòʼ, é kici, e lìr fo.

Kèʼ fo ghan foó fèy, bó Ŋgvəv wùn Ŋgom yòʼ yii kér viŋkar.

You are free to download, copy, translate or adapt this story and use the illustrations as long as you attribute in the following way:

Ŋgvəv wùn Ŋgom

Author - Winny Asara
Translation - Beatrice Tafon Takeh, Mbinkar Emmanuel Keelen
Illustration - Magriet Brink
Language - Lámnsoʼ
Level - First paragraphs