Hale hale ŋaliiŋo omuhaana eyi balanganga bati Neŋamba. Neŋamba gaali muhana owelomalomanianga. Nyina ya Neŋamba gamulabula aye Neŋamba natamuŋulira.

Lulala, masenge ya Neŋamba galwaye. Gaalinga engereha w'erungu.

Hu lunaku olwo nyina ya Neŋamba gali n'ebyohuhola. Egulo, enyanga ni jibitiriye, nyina ya Neŋamba gamuŋaye emeere ohuŋirira masengewe.

Hu ngira gageene ogu Nalaŋa ogwecuusa gwafuha muutu.

Ogu Nalaŋa gwamubuusa ehi gaali nagegiire, Neŋamba gagugoboyemo ati, "Nyama, amaagi n'amabeere." Nyina ya Neŋamba gaali amulabuye ohutaloma ehyagegire.

Era Neŋamba galomeye ogu Nalaŋa ati, "Masengewe mulwaye era ati nje eyi gaali nali huŋirira emeere."

Nalaŋa gaduluma ni geyuna geherere Neŋamba ohwola ewa masengewe.

Nalaŋa gamira masenge ya Neŋamba nga gewiiha ebbulangiti yiye.

Neŋamba ni golire, ehidaala hyali hiŋolongeye hyeene. Gatiina mu nyumba ng'alanga ati, "Senge, oli ŋeena?"

Nigawene n'ataŋulira janjasi lya masengewe, Neŋamba gatiina mu hisenge ehy'omugati eyi Masenge we gaŋenyuhahanga. Ehyamutusa efiiri hu mutwe nj'ohubona omuutu ni gewihire ebbulangiti ya masengewe.

Neŋamba gagubuusa ati, "Senge, lwahiina amatwi gago mabba gatyo?" Ogu Nalaŋa gwagoboyemo ni guli mu bbulangiti guuti, "Ko nahasobola ohuhuŋulira bulaŋi."

Neŋamba nindi gagubuusa ati, "Senge lwahiina emooni jijo mba jityo?" Ogu Nalaŋa gwa goboyemo guuti, "Ko nahahubona bulaŋi."

Muhuheneresa Neŋamba gagubuusa ati, "Senge, lwahiina omunwa gugwo mubba olwaleero?" Ogu Nalaŋa gwagoboyemo guuti, "Ko nahasobola ohuhumira." Nalaŋa ga pwanguha mu buliiri nga amira Neŋamba.

Olw'ohuba Neŋamba gaali muhaana owelomalomya, gegumya n'ohweromyalomya n'olugaali mu hida hy'ogu Nalaŋa. Gabuusa ebibuuso ebyeene ebingi.

Hu komerero, ogu Nalaŋa gwasinya ebibuuso bya Neŋamba ebingi nga gusalaŋo ohumuhaasa.

Abehitehere bayeeda Neŋamba ni masengewe. Ohuŋwa olwo ni n'olwo Neŋamba sigelomalomanianga n'abatamanyiire.