Omu biseera eby'eira wabbairewo omwala ogubeetanga bati Kadondi. OKadondi yabbaire mwala mutumulitumuli. Omaaye wa Kadondi n'amulabula obutatumulatumulanga ino, naye oKadondi tiyamuwulirisirye.

Lumo, oisenga wa Kadondi yalwaire. Yabbanga ku mugingi oguli oku lubba ly'ekiinamo okuteeba oku kyalo e w'aba Kadondi.

Olunaku olwo, omaaye wa Kadondi yafulugutanire n'emirimo. Omaaye wa Kadondi oweyawereire oKadondi emere okutwalira oisengawe obwire bwabbaire kanaigolo.

Oweyabbaire ayaba, n'asisinkana Gabeya omu nzira, eyabbaire oMpiti naye nga yeecuusire oti muntu.

OGabeya n'abuulya oKadondi ekiyabbaire yetiikire. OKadondi n'airamu ati, "Nyama, magi, n'amata." Omaaye wa Kadondi yabbaire amusisiitiire obutakoberaku omuntu yenayena ekiyetiikire.

OKadondi era n'akobera oGabeya ati oisengawe mulwaire era amutwalira mere. OGabeya n'atandiika okumira ebita olw'ekiloboozo ky'enyama oKadondi giyabbaire yeetiikire.

N'airuka mangu n'asoka oKadondi e wa isengawe.

N'amira oisenga wa Kadondi era ni yebiika ogubbulangiti.

OKadondi oweyatukire, yagyirye enyumba nga nsiriki ti, n'angira omu nyumba era n'ayeta oisengawe, ati, "Isenga, oli yaina?"

OKadondi oweyakaire okuwulira edoboozi lya isengawe, yangiliire kimo mu kisenge ky'omunda oisengawe egiyabbaire agona. Yewunyire owe yabwoine omuntu e yebwikire ogubbulangiti ogunene.

OKadondi n'abuulya ati, "Isenga, lwaki amatwigo manene ino olwatyanu?" OGabeya n'airiramu munda omu bbulangiti ati, "Kaisi isobole okukuwulira kusa."

OKadondi n'amubuulya tete ati, "Isenga, lwaki amaisogo manene ino olwatyanu?" OGabeya n'airamu ati, "Kaisi isobole okukubona kusa."

OKadondi n'abuulya ogusembayo ati "Isenga, lwaki omunwagwo munene ino olwatyanu?" OGabeya n'airamu ati, "Kaisi isobole okukumira." OGabeya n'abuuka okuzwa okukitanda n'amira oKadondi.

Olwokubba oKadondi yabbaire mutumulitumuli, yeyongeire okutumula n'oweyabbaire omu kida kya Gabeya. Yabwirye ebibuulyo bingi ino.

Okunkomerero, Gabeya n'asinya ebibuulyo bya Kadondi ebingi, era n'asalawo okumwandula.

Abantu b'oku kitundu balamilye oKadondi n'oisengawe. Okuzwa kwolwo, oKadondi tiyairireyo okutumulanga ino n'abantu abatamaite.