Kis dhano oŋeyo paka liec jo nitie gi umi gin maboyo.

To cango con, umi liec oyido cek aka cwe.

Onywol nyathi liec moro. Go oyido jakimega swa. Go obedo gi penji ri kis ogwaŋ.

Go obedo gi kimega kwoŋ kol. Openjo kol ni, "I raŋo initie gi ŋutin mabor?"

Obedo gi kimega kwoŋ liec adumo. Openjo liec adumo ni, "I raŋo tungin bith?"

Obedo gi kimega kwoŋ ngona. Openjo ni, "Cemo aŋo ma ngona jocamo othieno?"

Agak mariek owaco piyo piyo ni, "Luwan wakidhi i malawa. Koro i la neno gima ngona camo m'othieno."

Gi kenyo nyathi liec oluwo agak kiri i malawa.

Orire i toko to cungo i thengi pi. Oŋiyo pi. Ni kune ngona?

Tele ma thengi malawa omotho go ni, "Yoga!" Nyathi liec bende odwoko ni, "Yoga bende!" To penjo ni, "I nyalo waco raye gima ngona camo m'othieno?"

To tele waco ri go ni, "Biye cegin." To nyathi liec luŋere. Tele owaco ni, "Medi bino cegin." Nyathi liec omedo luŋirok.

Arwat ni kap! Ngona ogamo umi nyathi liec gi lake.

Nyathi liec ogik acen to pidho tiende matek to ywayo. To ywayo de ywayo. Kada ameno ngona koweyo ume.

Umi nyathi liec otele de to tele. To doko tele. Tundo go opodho taro ni, "Bum!"

Umi nyathi liec ma oyido cek onyo otele olokere mabor.

Umi go obor swa ma nyalo gamo kiri olemo wok malo i jangi yen. Aka kiri konon liec je jo ni gi umi gin ma boyo ma di kony.