Obusumi bwaira, Enkoko ne kihungu bikaba biri binywani. Byaikaraga mubusinge nebinyonyi ebindi. Busaho nakimu ekyaharrukaga.

Ekiro kimu, Enjara ekaba egwire muno Ekihungu kyandaga hara muno kuserra ebyokulya kyagaruka kijwahire muno. Ekihungu kyagamba, "Hatekwa kubaho omulingo ogwanguhire ogwokugenda."

Obuhahingwireho ebiro, Enkoko ekatunga ekitekerezo ekyamagezi. Ekatandika kusoroza ebyoya ebyagwaga kuruga habinywani byabyo. Enkoko yagamba, "Leka tubibazirre hamu haiguru yamapapa gaitu." Eki nikiija kutwanguhira kugenda.

Ekihungu nikyo kyonka ekyali kiine enkinzo mukyaro. Nikyo kyabandize kubazira. Kyayekorra amapapa amarungi kyaharuka haiguru y'enkoko. Enkoko yatiiza enkinzo baitu yajwaha bwangu temanyiire ebyokubaziirra. Enkoko ekasiga enkiinzo hakabada yagenda mukicumbiro kutekaniza ebyokulya by'Abanabe.

Baitu ebinyonyi ebindi bikaba birozire ekihungu nikiharruka. Byasaba enkoko ebitiize enkinzo nabyo byekorre amapapa. Mukasumi kake Ebinyonyi byali nibihurruka munyanya.

Ekinyonyi ekyokumalirra obukyagarwire enkinzo, Enkoko ekaba entaroho. Obwana bwayo bwatwara enkiinzo bwatandika kugizanisa. Obubwajwahire omuzaano, bwasiga enkinzo mumusenyi.

Iraho mwihangwe, ekihungu kyagaruka kyakaguza enkiinzo kuteraniza ebyoya ebyali bisumurrukire murugendo. Enkoko yarora hakabada, yarora mukicumbiro, yarora muzigati, baitu enkinzo ekaba ekakuzooka.

Mpayo ekiro kimu, Nukwo orateraniza amapapa gawe aharruke ogende kuserra ebyokulya omurundi ogundi. Ekihungu kyagamba Ekiro ekimu kyonka, Obworaba otazoire enkinzo, noija kumpa akana kawe kamu kunsasura.

Ekihungu obukyagarukire ekiro ekyahondiireho kikasanga enkoko nerahiza mumusenyi, baitu busamu nkiinzo. Ekihungu kika garuka kyagwa hansi bwangu kyakwata akaana kamu kyakatwara. Kuruga obu ekihungu buli kwiija kisanga enkoko nerahiza mumusenyi neserra enkinzo.

Ekituru kyamapapa g'ekihungu obukigwa ha'Itaka hansi Enkoko ehabura obwana bwayo, "Mwesereke kihungu aizire." Nabwo bugarukamu, "Tituli badoma nitwija kwiruka."