Khale ka khaleni swiharhi swa ha tshama kun'we enhoveni. Nkuku a wu ri wona hosi ya swona.

Nkuku a wu byerile swiharhi hinkwaswo leswaku xijuju xa wona ehenhla ka nhloko a xi endliwe hi ndzilo. Leswi swi endle leswaku swiharhi hinkwaswo swi chava nkuku.

Hi mikarhi ya kona, ndzilo a wu endliwa hi xitlhaka xa ndzilo. Siku rin'wana a ku ri na mpfula. Xitlhaka xa ndzilo xa mangwa a xi tsakamile. A swi nga ta koteka ku endla ndzilo ku kufumeta ndyangu wa yena.

Kutani magwa yi rhuma vana va yona ku ya kombela ndzilo ku suka eka xijuju xa nkuku.

Nkuku a wu nga tsakangi siku leri. Wu hlongorile vana va mangwa handle k ova nyika ndzilo. Mangwa a wu khunguvanyekile loko wu vona vana va vuya va nga ri na ndzilo.

Hi vusiku byebyo loko nkuku wa ha etlele, mangwa na vana va yona va ya yima ndzilo eka xijuju xa nkuku. Mangwa wu teka byanyi byo oma ehandle.

Yi fika yi vekela byanyi byo oma etlhelo ka xijuju xa nkuku. Kambe byanyi a byi khomanga ndzilo. Mangwa yi khumbisa kahle byanyi eka xijuju xa nkuku kambe byanyi byi nga khomi.

Vana va mangwa va khoma xijuju xa nkuku kambe ku nga twali ku hisa. Hiloko ndyangu hinkwawo wa mangwa wu hleka.

Xihleko xi endle leswaku nkuku wu pfuka xikan'we na vana va wona. Nkuku wu komba xijuju xa wona eka ndyangu wa mangwa wu karhi wu huwelela, "hatlisani mi tsutsuma. Kumbe a mi chavi?"

Mangwa yi hlamula yi ku: "Hi khumbile xijuju xa wena hi swi vonile leswaku a xi hisi. Hi ta ya byela na swihari leswin'wana. Va ta ku kwata swinene."

Tihuku na nkuku a swi chuhile swinene. Nkuku wu vuye wu baleka na tihuku. Ivi wu famba wu ya tshama na vanhu.

Ku sukela siku rero, tihuku ti chavile mangwa ti ya tshama na vanhu.