Ŋaaliŋo ebbasi ndala yonyene mu hitehere. Yaali mbala era nga ya bbululu nindi yaaba ya guhero.

Lulala, nyina ya Hiriga gamulomire ati, "Ejo hunahatiine mu tawuni ohugula eyinifomu y'esomero."

Hiriga gasangaaye bugali weene. Baali baja hugendera mu bbasi embala eya bbululu. Olwa masanyu amangi, si gaŋenyuha owiire owo.

Hiriga gaali gambaye hale aŋa nyina gajiiye ohumusisimusa.

Hiriga ni nyina bagenda ohwola hu siteji y'ebbasi. Baali aŋo ni balindire ebbasi. Aye ebbasi si yaajire.

Abaatu abandi boosi baajire hu siteji enyene eyo ey'ebbasi. Ebbasi yaali eruuye. Bebuusa baati, "Ebbasi etulehire?"

Hiriga gaali mweralihirifu gaŋeega ati, "Si hunaŋange hutiina mu tawuni; sinja hufuna yinifomu yange."

Abaatu abandi besinya bagobolayo engo cooka Hiriga galira na tenda hugobolayo. Nyiina gamuŋooyaŋooya gamuloma ati, "Efe hulindeho ŋa tootono."

Baali bahiiri aŋo, nga baŋulira amajanjasi. Baboona efuuhe mu bbanga. Ebbasi yaali yiija.

Ebbasi si yaali ya bbululu oba mbala. Yaali nando atenga ndidiri. Abaatu abaali aŋo ni balindire baheja hu bbasi bemotya ohuyingira.

Derefa geyasa ati, "Mwingire! Mwingire! Olwaleero huluuye bugali weene."

Hiriga ni nyina nj'abeheereeye ohwingira. Wali ohiiri nga hiisi muutu gengira mu habbasi ahalando.

Hiriga galengesa enje mu dinisa. Gabona abaatu bangi hu siteji.

Cooka abaatu baali beyuna ohuniina mu bbasi enyene eyo. Ehyembi, baali baluuye, ebbasi yaali yijuuye.

Nyina ya Hiriga gabuusa ati, "Ebbasi embala eya bbululu eri ŋeena? Dereefa gamugobolamo ati, "Yenonoohire, huli huyitereesa, enahaaje ejo."

Hiriga sigafayo hu kala y'ebbasi. Sigafayo hu sayizi y'ebbasi. Gaali musangafu olw'ohuba ti ebbasi yaali eri hutiina mu tawuni.