Ayei kolong ekile anyaritae Lodipo. Alomit ng'esi ka ng'aberu keng ng'aarei, Akai ka Akitela.

Aberu naapolon nabe Akai bon ng'esi eng'aranakini itokeng a Lodipo namuduki.

Apei kolong'it tolimok aberu naachi, Akitela, Lodipo tama, "Potu atowoto nakwap na eyei ekisil." Aremenete ng'imoe adakar naalomito kechi jiik. Etubulit Akai awose noi.

Tolimok Lodipo Akitela tama, nyemiekini ng'esi itokeng namuduki. Nakaneni, toneikin Akitela tama emiekisi akimat bon anawiyong'orot. "Pe kiwotok ng'oni kane, abong'i ayong nawi ang'ikatung'a," kigor Akitela.

Amina Lodipo aberu Akitela lokojokon, abu tachamu ng'akiro keng dio kisiakis akisuk akiwot. Esemee Akai, aberu naapolon, ng'akiro na asubasi ang'ibuloi.

Eboi ata Lodipo alojomu alokwap ekitoe. Pe ayeni ng'esi ibore ni asuba. "Kikokini ng'oni kimiekini ng'esi anawiyong'orot bon ai?" tama Akai.

Abu Lodipo ka ng'aberu keng kisiwoko ng'isikiria ng'iarei ng'iboro kech daang. Tosiwakis ekililing'at nyeyena akimat. Nakaneni, egoro Akai kotere akimiekin atakeng anawiyong'orot bon.

Kidong akimat nawiyong'orot. Kikalou tama: "Awesit a Lodipo ng'ina, Ekitoe Ka ng'akinei, nakolong kedounio, nyitonoma tani akolong'a, awesit ng'ina, Awesiti a Lodipo ng'ina Eriamaros moru apoloni-a."

Napei awoseta Lodipo ka ng'aberu keng, todolut ng'imoe toremo adakar.

King'ita ng'imoe ng'ulu akimat ewae lo ateni lokookeng. Tamasi ng'imoe akimat kiwapakini lokookeng ataara. Kimaima akimat kechi nyiara aberu naapolon ka ng'ide keng.

Tolimoki kechi nabo tama taramutu emesek keng lokolong aramari Lodipo.

Kiwapa ng'imoe awosit a Lodipo. Napei cha elomi kona, toremo awi keng. Taara ng'esi ka aberu naachi.

Abu Akai, aberu naapolon tobong'o ka emesek, toloma ka akimat wapei.