Amina ayong abolia ka lopaekang Chuma.

Kiminin ayong ka Chuma. Nakimearere, atoloto aapei.

Apei kwaar abu atakang katomea lodukan akigiel amakat ka akimiet. Kipotu erukosi ka Chuma.

Alorot, kipotu eng'olikisi ng'ide luche eboliasi epira lo ang'akejen.

Abu keburak ayong aboliakin epira ng'olo. Atama, "Woe! Epira!"

Atolimok Chuma atama, "Kapana elipa atoboliata kaapei epira. Amina ayong epira lo ang'akejen."

Tatachu Chuma tama, "Kapana mono lodukan, dio atobong'utu abolia."

Nabo atolimok Chuma atama, "Atoboliata mono yong! Kibong'o ng'oni nawi nyechamuni atakang."

Apotu ng'ide luche tachamut atoboliata aapei epira. Arai ayong eratakinit nilomio epira.

Erichakinit ayong epira nyeloma. Nyilomakina ng'ide epira tani epei.

Ayei asinyen nakaalan ni aboliare. Arai ng'amoru naapolok ewaakinitae nilomanakinio epira.

Arumoret abolia, atoloto lodukan, nakaneni kimakar ng'aropiyae. Esiak ayong akigoro.  Kekilak ayong Chuma, "Kimiek akigoro. Iyong ibala atoboliata ering'a nyeloto lodukan."

Atobong'osi nawi kimakar amakat kori akimiet. King'oriaka lokojokon!

Atoriamutu atakang eng'oit noi. King'it eking'aren tama, "Aliwae iyakasi eesi natete?"

Na ayenia atamar kichakarit sua ng'aropiyae, tama, "Karimakini akwar naka, nakaneni nyibong'okis nabo abolia pe eyenio."

Ekomakisi atipei akitan ng'ikukui ka ng'abatae. Ekisidi, elotaros atosegeta.