Bekuyintsambama yangeMgcibelo leshisa kakhulu, enyangeni yengongoni. Wonkhe umuntfu bekanyukubele. "Bontle, Mpho na Lerato, Hambani niyodlala ngaphandle!" kwasho unina. "Angifuni niloku nilandzelana nami."

Sagijimela ngaphandle. "Asambeni siye emfuleni," kwasho Lerato. "Phela kupholile emfuleni." "Kepha make wasitjela kutsi singabogeza emfuleni," kwasho Bontle. "Angeke sibhukushe," kuphendvula Lerato. "Sitawumane sidlale emtfuntini losedvute kwemanti."

Kepha kudlala elangeni kubanga kushisa, nanobe udlala emtfuntini losedvute nemfula. Kwekucala sakhumula ticatfulo tetfu, kepha besiloku sikuva kushisa. Sabuye sakhumula emahembe etfu netiketi. Kepha bekungekho umehluko, sikuva kushisa.

Safaka tinyawo emfuleni kuze siphole. Sase sitselana ngemanti. Ngemva kwaloko, besesihleti ekhatsi emantini.

"Hheyi buyani! Asibhukusheni," kwasho Mpho. "Make angeke ati ngaloko." Sabhukusha sabhukusha, sate sakhohlwa ngesikhatsi.

Lilanga beseliyoshona, sesicala kuva emakhata. Besitibeke kuphi timphahla tetfu?

Sibuke phansi kwetihlahla. Sabuka emahlatsini. Sabuka yonkhe indzawo.

Bekunetinkhomo eceleni kwemfula, tititika ngetjani lobunongotelako. Bontle wabuka etulu, "Buka leyankhomo! Yini lesemlonyeni wayo? "Idla imbali lebovu," kwasho Lerato. "Akusiyo imbali lebovu," kumemeta Mpho. "Lihembe lakho!

Sabuka lenye Inkhomo lebeyihlafuna lokuluhlata kwesibhakabhaka. "Siketi sami lesa!" kumemeta Bontle.

Saya ekhaya ngemaphenti, sichucha. Hhayi ngoba bekupholile kuphela. "Bekungenca yetinkhomo," sakhala. "Letinkhomo tidle timphahla tetfu." Ingabe make utasikholwa?Masinyane nje tibunu tetfu tatfola kufutfumala. Loku bekungasiko loko kwelilanga.