Eminyakeni leyendlula, licembu letilwane letinetimpondvo tancuma kutsi tibe nemcimbi lomkhulu etulu etintsabeni. Tamema tilwane letinetimpondvo kuphela. Letinye betingakavunyelwa.
Ngalesikhatsi ingulube iva ngalomcimbi, yacabanga yatsi, "Anginato timpondvo. Ingabe ngitawenta njani?"
Ngelilanga lelilandzelako, ingulube yaba nelichinga. Yabona kutsi inamatsisele timpondvo tayo ngemafutsa.
Lelichinga lengulube lasebenta nayo yativela ihlakaniphile nayivunyelwa kutsi ingene. Inkinga kutsi lomcimbi wawusedvute nelilanga.
Lekhatsi umcimbi sewucala kushisa sewumnandzi kakhulu, sinamatselisi setimpondvo tengulube sacala kuncipilika. Letilwane letinye tetimpondvo tamangala kakhulu. "Ngubani loya longanatimpondvo? Uteleni lapha?" tabutana tilwane.
Inkosi yetilwane yatilawula yatsi, "Bambani leya ngulube niyiphosele phansi emhlabatsini." Tayibamba ingulube tayiphosa phansi emhlabatsini.
Awu ingulube lehluphekile! Nayiwa yashaya phansi ngemphumulo. Imphumulo yayo yafacaka yaba sipatalala.
Ngaloko-ke kungamangalisi nanibona sipatalala semphumulo yengulube, kungoba kwasukela ngaleso sikhatsi.