Mam ko'εri la 'Kakuma' tinkpεŋa, ka ku'ε mε gee dukera, ti gu'usi tiisi zo'e, gee ti buusi zo'e gana nεreba.

Hali da'a la gingileŋa ka tari voole, gee tara pagebibesi n ka zo'e. Nεreba zo'e zo'e tari la kutoyiiro tuna sεla woo.

Daarε diyima bulika ti mam ma yi mam yele yeti, "Etabo, fu nyaa de la yuuma ayoobi zina. Tumam tari la bo'olum ti tu bo fu."

"A de la beni? A de la beni?" Mam soke mε la inkpeŋere. "Beere tu wan zom lore kiŋε da'a la n boi 'Eldoret' tiŋa la, a lebesego n bala. "Gee tu wan lagum tari fu kiŋε!"

Mam yeti n pͻsε ko tiinkӑtε puan! Mam suure daa pirε mε la nyiima ti mam gã gͻgãra yu'unkuŋͻ."

Yimbeere la ti tu boi la 'Kakuma' lεa siteesin, ti mam sɛgelε ginsi kuripaalε n de sangbanε gee yε fumͻlega zεa mam ma la n pugera tiŋasuka.

Mam daa ani la pika bͻna mam ma n de pͻgebãalewoko la n pugera n de pͻgekilektε la tiŋasuka.

Loore la daa ba pirε gaŋε mε, bala n daa sͻi ti mam zi'ire m ma nama zuo la.

Mam daa taregε mε la wͻlegͻ gee nyiima zuo, mam daa gise la bala gee ka nyε sεla n iŋε tole.

Suurε la daa kͻ'ͻm nyεkera mε ti tu me paara 'Eldoret' da'a la. Pͻka kayima n daa kooseri ki da'a la nuuren.

Budaasi siyi n daa boi ŋwana sa maasena ti ba du'usε nyubemeto s0ka kasεka puan sa.

S0ka kasεka puan me sa ti pͻgegirega kayima me zӑla matͻgesilega n de sangbanεnyagera pilu pilu. "M ma, m ma, bisε matͻgesilega wa sa!" Amaa m ma daa ve'e mam mε tole sa.

Da'a la tiŋasukaen sa, pagekãtε n daa boi ti ba kͻͻsa tiisi wͻla buuri buuri. Mam ka tabelε nyε tiisi wͻla wa asi'a kurum.

"Tiisi wͻla wa yu'ura?" Mam daa soke m ma.

A tiε nu'o pa'alε basεba, "Bana de la leemu, ti bana dεna gͻͻva." Mam la gelege yeti, "Gee bana?"

Tiisi wͻla la za'a n daa boi pakaen la, mam daa nͻŋε la apulε la gana za'a. Mam daa nͻŋε la ba naanε la ba mu'uŋͻ la. Mam daa ti'isε n suure puan ti ba wan za'asum la ŋwani.

Mam gelege yele m ma yeti, "Fu wan da ayima bo mam?"

N daa bo mam apulε la, ti mam pisegε m ma nu'o basε, gee zӑla tia wole wa la nu'usi siyi, nyaa nyi'e buulum la bͻba.

Mam ka tabelε di tia wole ti la nyakε wuu apulε wa n nyakε mam se'em wa. Mam puti'irε za'a daa boi la n apulε wa puan.

Mam daa obe apulε la ba'asε la, mam gorege ti n tͻgε bo m ma. Amaa a daa ka boi bilam! Mam bisε tumam ze'ele zi'an kiŋε na la, amaa mam ma la n pugera da aka boi bilam.

Mam bisε zuͻ la gͻbega za'a. Amaa ba daa ka boi yεnuuren.

"Yamam nyε mam ma?" Pͻgesesi n kooseri nyubemeto yεnuuren la ti mam daa soke. Ba puti'ira da aka lebe bilam. Mam pͻsε kεla.

La po'e fii, ti pͻka kayima gurε mam nu'o tari mam paε bͻbese'ere ti n kͻntaaba me lagum bͻna.

Budadaagelε n tari tεεŋa n pire paε n soke yeti, "Fum yu'urε de la beni, budibela wa?"

"E-ta-bo," Mam keli gee lebese se'em ŋwana.

La ana mam suure puan wuu ba tugum lagum kͻͻsa la kͻma da'a wa puan. Mam go'e kaasega gee limese zi'an woo ti n zi'im waa nyε ti nεra da kͻma la n boi deo la puan la.

La pugum ka yue, ti pͻka k0 na nyͻkε bia ayima. "Mam n de mina n wan tagelε ti ba wan tari kiŋε," mam puti'irε ti'isegͻ n bala. "La pa'alε ti, mam ka le kule yire me n bala!" Mam pͻsε kaasega le yε'εsa.

Mam daa wum ti burawagelε la n tari tεεŋa n pire paε la n boi bini yεta ti, "Etabo la bεε?" Ti mam kaasε gaŋε bala.

"Amaa mam ka boti ti n doose fu kiŋε!" Mam si'ina. Mam daa zͻ fͻregε a zi'an.

Mam ma la n pugera n wum mam yu'urε, ba kãbelε k0 la deo la puan na.

"Etabo, Etabo!" Mam ka bu'uri kͻa la n yi la. La daa de la m ma.

Mam daa isegeri ti n bobege m ma, mam pugera daa yeti, "Etabo, tumam eeri ni fu mε ti tu dikε fu dͻgum daarε bo'olum wa bo fu."

Ti a daa foe alopere n de sangbanε nyagera pilu pilu, tanpͻͻ kãtε puan. "La de la fu dinε!" eŋa yele ŋwana.