Kudala-dala, kwakukho iqela lezilwanyana ezineempondo elagqiba kwelokuba zibe nomdliva wetheko phezulu ezintabeni.

Zamema ezinye izilwanyana ezineempondo kuphela. Hayi ezinye.

Yathi ihagu yakuva ngeli theko, yacinga, "Heee, andinazimpondo kanene. Ndiza kuthini bethu?"

Ngengomso, yeza necebo. Yazenzela iimpondo!

Yazincamathisele ngamafutha okuncamathisela.

Lasebenza nyhani eli cebo, nehagu yazingomba isifuba ngokuhlakanipha xa ivunyelwa ukuba ingene kwitheko.

Ingxaki yayile yokuba umcimbi lo wawukwindawo ekufuphi nelanga.

Lathi lisakuyondelelana itheko, kumnandi nyhani kujuxuzwa, suke aqalisa ukunyibilika amafutha.

Yhoo! Nazo iimpondo zisiwa. Zothuka ezinye izilwanyana ezineempondo. "Ngubani ke ngoku lo ungenampondo? Ungene njani apha?" zabuzana.

Ikumkani yezilwanyana yangqokola isithi, "Nqakulani loo hagu niyiphosele kude le emhlabeni."

Hayi ke, zonke izilwanyana zithe zakuva ilizwi elibekwe yikumkani, zenza ngehagu njengoko ziyalelwe.

Zayixhakamfula ihagu, zayiphosa kude le ezantsi emhlabeni.

Owu usizana lwehagu! Laya kuwa bhuu phantsi ngempumlo. Impumlo yaba sibaca torho paca.

Ungothuki ke xa ubona ihagu inempumlo ethe paca ukuba sibaca oku, kuba ayizange itshintshe kusukela nga loo mini.