Iri kwaaraa ga ti Kakuma. Nangu no kaŋ ga koogu, a ga dungu, tuuri karji koyey ba gumo nda mo koyne hinciney ba nda borey. Ba habo ga yay no, a gonda nga tandayze yaŋ. Beelo boŋ no borey baayaŋ kulu go.

Han fo, ay ɲa na ce ga ne ay se: "Etabo, hunkuna, ni te jiiri iddu. Gooro no iri du ni se." Cahãyaŋ ra, ay ne: "Ifo no? Ifo no?" Ay ɲa tu ay se ga ne: "Suba, kaaro ra no iri ga koy habu. Iri ga konda ni iri banda." Ay gallu koyyaŋ sintina! Misa go ga ay beejandi ka jirbi mongo ay se cino din.

A suba, Kakuma teesamo ra, ay go ga kay ay ɲa nda ay haway game ra nda ay mudun tajo nda ay poolayze ciray. Ay di kaŋ ay te ikayna fo ay ɲa kaŋ ga beeri a ga mari nda ay haway waraga game ra.

Kaaro to kala ay goro ay ɲa cey boŋ. Dunga nda kungazuro farga se, jirbi na ay sambu, ay mana di hari kulu fonda ra.

Wayna go ga fatta no kaŋ iri furo Eldoret habo ra. Wayboro fo go ga nga ntaasu neera habo furanta. A jare ga kayna, alboro hinka fo go ga soola ga ngey kuuduku neera. Kambu fo mo ga, wayboro dunguryo fo go no, kaŋ gonda nga kamba ra foori abiyo ize kayna ɲalawante fo. "Ay ɲa, ay ɲa guna foori-foori abiyo izo din!" Day ay ɲa na ay kamba di ga candi.

Habo bindo ra gonda tanda bambata fo kaŋ gonda tuuriize dumi-dumi yaŋ. Ay sib a tuuriize cindo bay. Ay na ay ɲa hã: "Mate ga ci tuuriizey wo ma?" A na i cabe ay se, ga ne: "Leemu yaŋ no ne-wo mo gayaabu yaŋ no." Ay zagu ga ne: "Wo-ne yaŋ fa?"

Tuuriizey kulu kaŋ i kanandi ra, pommo no ga kaanu ay se. I takey nda i harey no ga kaanu ay se. Ay bay day i ga kaanu gumo. Ay bare ga zagu ga ay ɲa guna, ga ne a se: "Ni ga day ay se afo?"

Za ay ɲa na pommo sale ay se no, ay na a kamba taŋ. Ay na pommo ta nda kambe hinka, ay na ɲarfa. Ay mana bay ga ma tuuriize kaani ga to pommo din. Pommo din hinne ga no ay lakkalo go.

Waato kaŋ ay na ay pommo ŋwa ga ban, ay na boŋ sambu ga salaŋ ay ɲa. Wiiza a si ay jare ga! Ay zagu ga guna kura kaŋ haray iri fun, ay ɲa nda ay haway kulu si no. Ay guna ay kambe-ŋwaari haray, ga ay kambuwo haray, i si no-din mo. Ay na wayboro fo yaŋ hã hala i mana di ay se ay ɲa. I mana tu ay se, kulu ay sintin ga hẽ.

Kaŋ a gay kayna, wayboro fo na ay kamba di ga candi ga konda ay zanka fo yaŋ do. Alboro bambata fo kaŋ gonda kaabe kuuku na ay hã, "mate ga ti ni ma arwaso?" Ay ne a se: "E-ta-bo."

Ay na ay boŋ hã hala zankey mo i go ga i neera no habo ra. Ay na hẽẽno naŋ, ay go ga guna ga di fuwo ra hala zanka dayko go no. Kala wayboro fo ka, a dira nda zanka fo. Ay ne: "Ay bay day hino wo ay no i ga dira nda" wo-din banda, "ay si ye ga koy fu koyne." Day ay ye ga sintin hẽẽno.

Kaŋ ay ma kaabekoyo kaati ga ne: "Man ga Etabo?" ay ye ga tonton ay hẽẽno ga. Ay ne: "Ay si araŋ gana ga dira", ay go hẽẽni ga. Ay zura ga moor'a.

Kaŋ ay ɲa nda ay haway ma ay maayo, i waasi ga furu. Ay ma jinde fo kaŋ ay ga bay go ga ne: "Etabo, Etabo" wiiza ay ɲa no.

Waato kaŋ ay haamay ga tun ga koy ay ɲa do, ay haway ne: "Etabo, iri go ga ni ceeci iri ma ni no ni jingar goora." Nga saaku bambata fo ra, a na foori-foori abiyo beeri fo ka. A ne ay se: "Ta, ni wane no."