Sadǝ be, yimdǝ mǝktua.
Kanguwu kawunju kada ingi cǝwandǝnni.
"Ingi sim fal ragǝkko, kalu kǝskayen curi yaye."
Kǝlanguma ngamngen.
"Ingi yakkǝni wa nukki, cǝni kanguwu. Falwu wuljai fakki adǝro sai lekkiya."
"Falwudǝ njadi" cǝne tia kǝnnari galayen.
Kanguwudǝ jauro ngudu fanji. "Ingi yakkǝni wa nukki."
Kanguwu jawal falwuye kida.
Kajǝm ngamndu–a kǝska ngamndu-ayen.
Har kowo ingi falwuye fanjiro walyen.
Kanguwu cin cappo ingi samdu kiya.
Kǝji fanji ngai, karaa isidǝa curunni.
Kanguwu kajǝm ngamndu fuwunjuye kǝla ingiyen lejidǝa cǝdai yenniya ingi tia kiado.
"Banasǝgǝnowoye, bana makki martǝgǝnowoye."
"Tadde nagatto" yeno bolbolye kǝska cinin cǝdanadǝro.
"Bolboloa wusekkǝni duwon rangǝkke saptǝkkiwawo. Gurekki ingi njaro isi."
Yim laa, gure cǝdi duwon, tadawa yindi falwudiro kadira dongonja ngudo njejoyea.
"Bolbolo kura laa isi na adǝro ingi njaro" yeno tada faldǝ. "Masǝnande kuye cidi."
"Tadawa ania kollǝkke bolboldǝa ceyesiwawo. Wu ye ganama awi dikkiya ngǝla wo?"
Sakku adǝn bolbolodǝ ingi njaro kǝskan jǝpken.
Kanguwu dawori laa kǝlanjuro kadio.
Si tada fallero kǝrdiye dunonjun giyiro.
Tadadǝ sǝkti, buruwu cakki. Waiyo! Waiyo! Cǝni.
Bolbolo ajapcǝna ngai, farje leje gǝragada.
Adǝgainin kanguwu bolboloro sernju kikkǝrǝmbo.