Fanda kǝji con amwurawanjua kasarga har kawu sanuiro. Ti kǝrwu mewua kasuno.

Fanda Kolo kǝraminju laa kuruwuye dapco. Kolo fandaa cǝragǝna amma kǝmǝrjo ye talaa ye.

Fanda sa san kauri amwurawanjuyero leje, kuttunju tairo wuljiyi.

Yim laa, kauridǝro walde leyenniya kǝnjo kiwondo. Buda masammanne kǝla kauri amwurawanjuyedǝn kiro.

Budadǝ aiya kǝji laa karwusambe yeyeno. Fanda kowo yanju bawojǝnayedǝa asuyen. Ngo awo wuljidǝ:.

Fanda, Fanda! Feronde bargaa! Ni runǝm gǝni, feroni! Buda adǝa rone feroni! Na lenǝmi ngaro yade feroni! Kolle karwunǝm kǝjiro cǝdo feroni!

Fanda budanju sawowuyedǝa ndara yayero cadi. Barga budanjuyen amwurawanju roa tia caɍiwi gairo fanji.

Yim laa, tajǝrwa buda sawowuyedǝa kiwondo. Fanda falwuro leji duwon budadǝ falgada. Ti ye karwunju kuttayeno.

Fanda njango budayedǝa nukkon roje aiya badiyen.

Ya-a bawa-a, Ruiwo budadǝ namdǝna. Buda siwwadǝ. Awi dikki? Martǝnowo nungowo Wuro kinsǝgǝwaro nokko.

Fanda kowo yanjuye tiro mana cǝddi fanngǝn: "Feroni njango gapcǝnadǝa camme. Tandiya ngone, ingi mane sinǝm tulle. Yerǝmiya, simmǝm jange." Fanda mana yanjuye ngoyenniya, budadǝ nanju cayero walgada.

Fanda cayedǝgai na leji ngaro budanju cadi. Na lejǝna ngan am kattenjan tattawi cadi. "Buda awiye attǝ?" Budanju sawowuyedǝn, Fanda awo cǝragǝna nga cǝwandi.

Barga budanju sawowuyedǝn, Fanda amwurawanju tiro kissaganaro nojǝna. Awima diwi tia cǝwandiwawo.