Dumisani u khou ṅwala mafhungo ane a ḓo dzheniswa kha magazini ya tshikolo tshawe.U khou ambedzana na vhana vha re tshikoloni tsha hawe nga ha tshenzhelo dzavho dza dwadze ḽa Covid.U amba na vhagudiswa nga tshifhinga tsha u awela.

“No humbula mini musi ni tshi pfa lwa u tou thoma nga ha tshitzhili tsha Corona?” hu vhudzisa Dumisani.“Vhathu vhanzhi vha tenda zwine vha zwi vhona, hu si zwine vha zwi pfa. U thomani, vhaṅwe vho amba uri tshenetsho tshitzhili a tshiho,” hu amba Moses.

Moses u bvela phanḓa, “Vhaṅwe vhathu vho vha vha sa ṱoḓi u tevhela milayo. Ndo vha vhudza uri roṱhe ri fanela u tevhela milayo ya dwadze, ngauri arali ra sa zwi ita, tshitzhili tshenetsho tshi ḓo dzula tshi hone.”“Hayani na hune nda dzula hone, ro tevhela milayo!” Zwanga a tshi dzhenelela.

Zwanga ndi ḽifhaṱa ḽa Moses. Moses u sedza Zwanga.“Ni khou amba ngoho?” Moses a tshi vhudzisa.“A thi khou ri vhathu vhoṱhe vha hune ra dzula hone, fhedzi vhaṅwe vhavho!” Zwanga a tshi ḓiimelela.Vhagudiswa vha sea. Zwo vha zwo tou ralo kha vhathu vhoṱhe.

“Ho vha hu na milayo minzhi!” Zwanga a tshi gungula.U bvela phanḓa, “Ni songo fara tshifhaṱuwo tshaṋu, ni songo ḓifara ningo, ni songo ḓifara mulomo, ni songo dzhena bisini yo ḓalaho vhathu. Ṱambani zwanḓa, shumisani sanithaiza, ambarani ‘mask’, ni songo vha tsini na tsini…”Zwanga u fhelelwa nga muya.

Moses uri, “Eish, nyiledzo ya u tshimbila dzibadani ya u thoma yo vha i tshi konḓa!”Dumisani u vhudzisa tshigwada, “No kona hani u sedzana na nyiledzo ya u tshimbila dzibadani?”Mpho u a fhindula, “Zwo vha zwi sa takadzi! Ro vha ri tshi dzula hayani ra ṱalela thelevhishini. U thomani, ro vha ri sa bveli na nnḓa.”

“Zwo vha zwi tshi konḓa u vhalela hayani ngauri hu na phosho nnzhi,” hu amba Basani.“Ndo vha ndi ndoṱhe. Ndo vha ndi tshi ṱoḓa muṅwe muthu uri a nṱalutshedze mushumo we nda ṋewa wone,” Bongi a tshi amba.“Na nṋe ndo vha ndi tshi khou konḓelwa nga mushumo wanga wa tshikolo,” hu amba Mpho.

“Zwino no vha no takala musi zwikolo zwi tshi vulwa?” Dumisani a tshi vhudzisa.“Musi ndi tshi humbula nga u humela kiḽasini ndo vha ndi tshi vhona u nga a zwo ngo tsireledzea u vhuyelela tshikoloni,” hu fhindula Andzani.Abdul u a tenda, “Riṋe sa vhagudiswa ri nga kha ḓi sa tevhela milayo kana ra hangwa.”

“Ndo vha ndi tshi humbula uri zwikolo a zwo ngo fanela u vula,” hu amba Basani.Mpho uri, “Ndo vha ndo takalela u vhuyelela kiḽasini, u vhuyelela tshikoloni.”“Na nṋe!” hu amba Moses, nahone Zwanga a tenda nga ṱhoho.“Ho shanduka mini zwino tshikoloni?” hu vhudzisa Dumisani.

Moses u a thoma, “Ndi tshithu tshithihi fhedzi tsho shandukaho tshikoloni u bva tshee ha thoma dwadze ḽa COVID-19 nahone tshenetsho tshithu ndi …”“… uri tshithu tshiṅwe na tshiṅwe tsho shanduka!” Zwanga u fhedzisa mutaladzi wa mukoma wawe.Khonani dzavho dzi a sea na u tenda. Ḓilogo ya tshikolo ya mbo ḓi lila nahone ndi tshifhinga tsha u ya kiḽasini.