Yinye kuphela intfo lentjintjile
African Storybook
Sibusiso Khumalo
Siswati
Longer paragraphs
Dumisani ubhala sihloko lesitawungena kumagazini wesikolo sakhe.
-
Ucocisana nebantfwana basesikolweni sakhe ngetintfo letenteke kubo ngesikhatsi selubhubhane lwe-Covid.
-
Uyahamba ayokhuluma nebafundzi ngesikhatsi selikhefu.
1
“Yini lowayicabanga ngesikhatsi ucala kuva ngeligciwane le-Corona?” kubuta Dumisani.
-
“Bantfu labanyenti bakholwa intfo labayibonako, hhayi labayivako. Ekucaleni, labanye bebatsi leligciwane yintfo lengekho,” kusho Moses.
2
Moses uyachubeka, “Labanye bantfu bebangafuni nekulandzela imitsetfo. Bengibatjela kutsi sonkhe kufanele silalele imitsetfo yalolubhubhane ngobe nasingalaleli, leligciwane aliyi ndzawo...”
-
“Tsine ekhaya kanye nasendzaweni yakitsi siyayilandzela imitsetfo!” kuphatamisa Zwanga.
3
Zwanga ngumnakabo Moses loliphahla naye. Moses ubuka Zwanga.
-
“Tsani uyadlala?” kubuta Moses.
-
“Angisho kutsi wonkhe umuntfu endzaweni, kepha ngisho labanye babo!” kuphendvula Zwanga etama kutivikela. Labanye bafundzi bahleka ngobe bekuyintfo lefanako kubo bonkhe.
4
“Kepha betitinyenti kakhulu ticondziso nemitsetfo!” kukhononda Zwanga.
-
Uyachubeka, “Ungatsintsi buso bakho, ungatsintsi imphumulo yakho, ungatsintsi umlomo wakho, ungagibeli ebhasini legcwele kakhulu. Geza tandla, sanithayiza, gcoka sifonyo, khwesha kulabanye bantfu…”
-
Zwanga uphelelwa ngumoya.
5
Moses watsi, “Eish, vele i-lockdown yekucala beyimatima kakhulu!”
-
Dumisani wabuta licembu lebafundzi, “Nabhekana njani ne-lockdown?”
-
Mpho waphendvula, “Bekungasimnandzi! Kuphela kwentfo lobewungayenta kuhlala endlini ubukele mabobakudze. Ekucaleni, bekungafuneki nekutsi uye ngephandle.”
6
“Bekulukhuni kutadisha ekhaya ngobe bekunemsindvo lomnyenti,” kusho Basani.
-
“Bengingendvwa. Bengidzinga umuntfu longangichazela umsebenti lebenginikwe wona,” kusho Bongi.
-
“Nami bengidvonsa matima ngemsebenti wami wesikolo,” kusho Mpho.
7
“Manje, najabula yini ngesikhatsi tikolo tiphindze tivulwa?” kubuta Dumisani.
-
“Mine nangicabanga ngekubuyela eklasini bengivele ngibone kutsi akukaphephi kahle kuya esikolweni,” kuphendvula Andzani.
-
Abdul uyavuma, “Tsine bafundzi singase singayilaleli imitsetfo nobe singase siyikhohlwe.”
8
“Bengicabanga kutsi tikolo bekungakafaneli kutsi tivulwe,” kusho Basani.
-
Mpho watsi, “Mine bengikujabulela kubuyela eklasini, nekubuyela esikolweni.”
-
“Nami futsi!” kusho Moses, naZwanga uvuma ngenhloko.
-
“Kuhluke ngani manje esikolweni?” kubuta Dumisani.
9
Kwacala Moses watsi, “Yinye kuphela intfo lentjintjile esikolweni solo kwacala lolubhubhane lwe-Covid-19…”
-
“…Usho kutsi konkhe kuntjintjile?” Zwanga ucedzela umusho wemnakabo.
-
Bangani babo bahleka base nabo bavumelana nabo. Insimbi yesikolo yakhala sekusikhatsi sekubuyela
emaklasini.
10

——Imibuto


  1. Yini leyafika engcondvweni yakho ngesikhatsi ucala kuva nge-Covid-19? Sicela uchaze.
  2. Chaza ligama ngalinye ngemavi akho: lubhubhane, sanithayiza, i-lockdown.
  3. Tfola emagama endzabeni lanemcondvo lowehlukile kuwe-siphetfo, kukhala, kute lutfo, lokuncono kakhulu.
  4. Kungani kufanele sihlale sitigeza tandla tetfu?
  5. Ngimiphi imitsetfo sikolwa sakho lesilindzele kutsi uyilandzele? Ucabanga kutsi yini leyenta ibaluleke?
  6. Kusho kutsini kutsi, ‘Yinye kuphela intfo lentjintjile’?
  7. Ucabanga kutsi yini lebangela hulumende kutsi aphindze ativule tikolo?
11

——


Lencwadzi yetindzaba isekelwe embikweni wesiteshi semsakato lokutsiwa yi-RX. I-RX Radio siteshi semsakato sebantfwana lesiku-intanethi, lesisungulwe saphindze sakhelwa bantfwana.
-
I-RX Radio isakatela e-Red Cross War Memorial Children's Hospital eKapa.
-
I-RX Radio isita bantfwana bacoce ngetintfo letibalulekile kubo.
-
Vakashela i-RX Radio
12
Attribution CC BY
Your attribution should include the following:
Title: Yinye kuphela intfo lentjintjile
Author/s: African Storybook
Translator/s: Simangele Khoza
Illustrator/s: Sibusiso Khumalo
Assurer/s: Mduduzi Benjie Shongwe
Language: Siswati

© Zenex Foundation - Saide 2025 (Updated Edition)

CC BY includes the following elements:
 BY   – Credit must be given to the creator