Dumisani o kwala athikele ya makasine wa sekolo sa bona.O botsolotsa bana kwa sekolong sa gagwe ka maitemogelo a bona a leroborobo la Covid.O ya go bua le barutwana ka nako ya go ikhutsa.

“O ne o nagana eng fa o utlwa lwa ntlha ka mogare wa Khorona?” Dumisani a botsa.“Batho ba bantsi ba dumela se ba se bonang, e seng se ba se utlwang. Kwa tshimologong, bangwe ba rile mogare o, ga o teng,” ga bua Moses.

Moses a tswelela, “Batho bangwe ba ne ba sa batle go obamela melawana. Ke ba boleletse, re tshwanetse rotlhe re latele melawana ya leroborobo, gonne fa re sa dire, mogare ga o kitla o ya gope…”“Kwa gae le mo motseng, re latetse melawana!” Zwanga a mo tsena ganong.

Zwanga ke lefatlha la ga Moses. Moses a leba Zwanga.“A o bua o tiisitse?” ga botsa Moses.“Ga ke reye batho ba botlhe mo motseng, fela bangwe ba bona!” Zwanga a gakala.Barutwana botlhe ba tshega. Go ne go le jalo go mongwe le mongwe.

“Go ne go na le melao le melawana e mentsi!” Zwanga a ngunanguna.A tswelela, “O se ke wa tshwara sefatlhego, o se ke wa tshwara nko, o se ke wa tshwara molomo, o se ke wa tsena mo beseng e e tletseng. Tlhapa diatla, tshasa sebolayaditwatsi, apara mmaseke, katogana le ba bangwe…”Zwanga a felelwa ke mowa.

Moses a re, “Eish, paka ya ntlha ya thibelonakwana ya go se tswele kwa ntle e ne e le boima!”Dumisani a botsa setlhopha, “O dirile jang ka paka ya thibelonakwana ya go se tswele kwa ntle?”Mpho a araba, “Go ne go se monate! Se o se dirileng ke go nna mo gae, o bogele TV. Kwa tshimologong, o ne o sa kgone go tswela le kwa ntle.”

“Go ne go le thata go ithutela fa gae, go na le modumo o mogolo,” ga bua Basani.“Ke ne ke le nosi. Ke ne ke batla mongwe go ntlhalosetsa tiro e ke neng ke e filwe,” ga bua Bongi.“Ke ne ke tshwenyega thata ka tiro ya me ya sekolo,” ga bua Mpho.

“Jalo, o ne o itumetse fa dikolo di bulwa gape?” ga botsa Dumisani.“Monagano wa me wa gore re boela dithutong e ne e le gore ga go a babalesega thata go ya sekolong,” ga araba Andzani.Abdul a dumela, “Rona re le barutwana re ka nne ra se latele melawana kgotsa re ka lebala.”

“Ke ne ke sa akanye gore dikolo di tshwanetse go bulwa gape,” ga bua Basani.Mpho a re, “Ke ne ke itumetse thata go boela mo phaposiborutelong, go boela kwa sekolong.”“Le nna!” ga bua Moses, mme Zwanga a koba ka tlhogo.“Pharologano ke eng jaanong kwa sekolong?” ga botsa Dumisani.

Moses a simolola, “Go na le selo se le sengwe fela se se fetogileng fa sekolong fa e sa le ka leroborobo la COVID-19 mme sone ke…”“… gore sengwe le sengwe se fetogile!” Zwanga a feleletsa polelo ya lefatlha la gagwe.Ditsala tsa bona tsa tshega ka go dumela. Tshipi ya sekolo ya lela e le nako ya dithuto.