Go fetogile selo se tee fela
African Storybook
Sibusiso Khumalo
Sepedi
Longer paragraphs
Dumisani o ngwalela makasine wa sekolo sa gabo athikele.
-
O swere dipolelotherišano le bana ba sekolo sa gabo mabapi le maitemogelo a bona ka leuba la COVID-19.
-
O boledišana le barutwana ka nako ya poreiki.
1
“Na le be le nagana eng ge le thoma go kwa ka twatši ya Corona?” Dumisani a botšiša.
-
“Batho ba bantši ba dumela fela seo ba se bonago, e sego seo ba se kwago. Mathomong, batho ba bangwe ba be ba re twatši ye ga e gona,” Moses a realo.
2
Moses a tšwela pele, “Ba bangwe ba be ba sa nyake go latela melao. Ke ba boditše go re, ka moka re swanetše go latela melao ya go efoga leuba le, gobane ge re sa dire bjalo, twatši ye e ka se fele.”
-
“Ka gae le mo motseng, re ile ra latela melao!” Zwanga a ba tsena ganong.
3
Zwanga ke lefahla le Moses. Moses a lebelela Zwanga.
-
“Na o tloga o tiišitše?” Moses a botšiša.
-
“Ga ke re batho ka moka ba mo motseng, efela ba bangwe ba bona!” Zwanga a ipelaetša a realo.
-
Barutwana ba bangwe ba sega. Mo go bona go be go swana.
4
“Go be go na le melao le ditaelo tše dintši!” Zwanga a realo ka go belaela.
-
A tšwela pele, “O se kgome sefahlego sa gago, o se kgome nko ya gago, o se kgome molomo wa gago, o se namele pese ya go tlala kudu. Hlapa matsogo, tšhela sebolayaditwatši matsogong, apara maseke, šia sekgoba se se beilwego magareng ga gago le batho ba bangwe…”
-
Zwanga a hema ka boima.
5
Moses a re, “Hei! Ka nako ya kiletšo ya mesepelo ya mathomo, go be go befile kudu!”
-
Dumisani a botšiša ba sehlopha, “Na le kgonne bjang go swaragana le go tswalelwa ga dilo ka moka?”
-
Mpho a araba, “Go be go se bose! Seo o bego o ka se dira, e be e le go dula ka gae, wa bogela thelebišene. Mathomong, o be o ka se sepelele ka ntle.”
6
“Go be go le boima go ithuta o le ka gae ka lebaka la go re go na le mašata,” Basani a realo.
-
“Nna ke be ke nnoši. Ke be ke nyaka yo a ka ntlhalošetšago mošomo wo ke o filwego,” Bongi a realo.
-
“Le nna ke be ke tshwenyega kudu ka mošomo wa ka wa sekolo,” Mpho a realo.
7
“Na bjale o be o thabile ge dikolo di bulwa gape?” Dumisani a botšiša.
-
“Ke be ke gopola gore go boela diphapošing tša borutelo ga se gwa bolokega,” Andzani a fetola.
-
Abdul a dumelelana le yena, “Rena bjale ka barutwana re ka no se latele melawana goba ra lebala.”
8
“Ke be ke sa nagane gore dikolo di swanetše go bulwa gape,” Basani a realo.
-
Mpho a re, “Ke be ke thabetše go boela phapošing ya borutelo le go boela sekolong.”
-
“Le nna!” Moses le Zwanga ba dumela ka dihlogo.
-
“Na ke efe phapano ye e lego sekolong gabjale?” Dumisani a botšiša.
9
Moses a thoma, “Go tloga ka nako ya leuba la COVID-19, go fetogile selo se tee fela kua sekolong …”
-
“… ke gore go fetogile dilo ka moka!” Zwanga a feleletša lefoko la buti wa gagwe.
-
Bagwera ba bona ba sega ebile ba dumelelana le bona. Tshipi ya sekolo ya lla gomme ka moka ba kitimela diphapošing tša bona.
10

——Dipotšišo


  1. Na o ile wa nagana eng ge o ekwa ka COVID-19 la mathomo?
  2. Hlaloša tše di latelago ka mantšu a gago: leuba, sebolayaditwatši, go tswalela dilo ka bontši.
  3. Hwetša maganetši a mantšu a go tšwa kanegelong: mafelelo, lla, go hloka selo, kaone.
11

——


Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.
-
Seteišene se, se gašwa go tšwa Bookelong bja Bana bja Red Cross War Memorial go la Kapa.
-
Radio RX e thuša bana go anega dikanegelo mabapi le ditaba tšeo di lego bohlokwa mo go bona.
-
Etela RX Radio
12
Attribution CC BY
Your attribution should include the following:
Title: Go fetogile selo se tee fela
Author/s: African Storybook
Translator/s: Dikeledi Queen Shai
Illustrator/s: Sibusiso Khumalo
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
 BY   – Credit must be given to the creator