Vincent ubika tindzaba temsakato lokutsiwa yi-RX Radio Station. Usetindlini tekusakata te-RX Radio kute arekhode luhlelo lwakhe.Lamuhla, luhlelo lwaVincent lukhuluma ngebantfwana labaphila netinkinga temphilo letibucayi.Ucocisana nabo kute atfole lokwentekile kubo kulesikhatsi selubhubhane lweCovid-19.

“Sanibonani emakhaya, lona nguVincent etindlini tekusakata te-RX Radio. Lamuhla, sivakashelwe nguMulalo, Ashley, kanye naLina,” kusho Vincent.Tivakashi tiyatetfula.Vincent uyachubeka, “Lubhubhane lweCovid-19 lube matima kakhudlwana kubantfu labaphila nekukhubateka. Ngisacela nitjele tilalele tetfu ngaloko.”

Mulalo uyacala, “Mine nginesifo lesingumahlalakhona lokutsiwa spinal muscular atrophy. Sihlasela imisipha yami – imilente yami, imikhono, kanye nekuphefumula.Kube ngike ngangenwa ngulesifo seCorona virus, sahlangana nalesifo sami, bekutangibulala! Emaphaphu ami akasebenti kahle futsi njengobe lesifo sihlasela wona bekutawuphela ngami!”

Lina utsi, “Nami bengetfuke kakhulu. Nginesifo sesifuba lokutsiwa yi-asthma, lesihlasela emaphaphu ami.Bengitsi nangikhwehlela nobe ngiphefumula kamatima, bengivele ngingati kutsi ngule asthma yini nobe yiCorona virus. Kube ike yangingena beyitawuba yimbi kakhulu esifubeni sami.”

Ashley uyengeta, “Mine nginesifo lokutsiwa yi-bipolar. Sihlasela ingcondvo yami futsi kudzingeka nginatse emaphilisi ngenca yaso.Ngaletinye tikhatsi ngitiva ngiphatseke kabi ngalokwecile, nobe ngitive ngitfukutsele ngalokwecile. Ngaletinye tikhatsi imiva yami igucugucuka masinyane. Kuba lukhuni kulawula indlela lengitiva ngayo.”

“Siyabonga ngekuhlanganyela natsi loko lokwenteka ekuphileni kwenu. Kukhona yini lokuhle lokwenteke kini ngesikhatsi selubhubhane?” kubuta Vincent.“Ngikhonile kucitsa sikhatsi nemndeni wami. Besidlala umdlalo webhodi ndzawonye, bengikujabulela kakhulu loko,” kusho Lina.

“Nami ngibe nesikhatsi lesimnandzi nemndeni wami. Lokuhle kutsi bengikhona kutelapha ngisekhaya,” kuphendvula Mulalo.“Mine ngincume kusisebentisa kahle lesikhatsi nalelitfuba. Ngibe nemndeni wami. Ngiphindze ngasondzelana naNkulunkulu ngithantaza,” kusho Ashley.

Vincent ubuka liwashi elubondzeni. Bese utsi, “Mane nje sikhatsi setfu sesiyaphela!”“Kulabanye bantfwana nabo lokutfolakale kutsi bayagula engcondvweni nobe emtimbeni, ngumaphi emavi lasikhutsato leningabashiya nawo?” kubuta Vincent.

Ashley uphendvula kucala, “Bayabandlululwa bantfu labagula ngengcondvo.Utsatfwa njengemuntfu lohlanyako nobe lotsandza kunakwa, futsi mine ngifuna lentfo leyo ishintje. Akusilo licala kutsi awutiva kahle.”

Lina uyavuma bese utsi, “Seluleko sami lesiya kulabanye kutsi tinakekele. Yehlisa umoya. Ngobe loko lokwentako nyalo ngiko lokusemandleni akho.”Mulalo uyengeta, “Futsi ungapheli emandla! Tinkinga tikhona kepha usengawafeza emaphupho akho.”