Vincent ke mmegakgang wa seteišene sa RX Radio. O kwa Ntlokgaso ya RX Radio go gatisa lenaneo la gagwe.Gompieno, lenaneo la ga Vincent le ka ga bana ba ba tshelang ka malwetse a a masisi.O ba botsolotsa ka ga maitemogelo a bona ka nako ya leroborobo la Covid-19.

“Dumelang bareetsi, ke nna Vincent mo Ntlokgaso ya RX Radio. Gompieno, baeng ba me ke Mulalo, Ashley le Lina,” ga bua Vincent.Baeng ba ikitsise.Vincent a tswelela, “Leroborobo la Covid-19 le ne le le kgwetlho e kgolo segolo bogolo mo bathong ba ba tshelang ka bogole. Ke kopa le bolelele bareetsi ka seo.”

Mulalo a simolola, “Ke na le bolwetse bo bo sa foleng ba koafalo ya mesifa ya mokokotlo. Bo ama mesifa ya me – maoto, matsogo, le go hema.Fa mogare wa Khorona le bolwetse ba me di ne di ka thulana, di ka bo di mpolaile! Makgwafo a me a bokoa mme ka mogare oo nkabo ke sule!”

Lina a re, “Le nna ke ne ke tshogile. Ke na le bolwetse ba asema, bo kgoreletsa makgwafo.Fa nka gotlhola kgotsa ka hema bokete, ke ne ke sa itse gore a ke asema kgotsa ke mogare wa Khorona. E kabo e nkamile mafatlha mo go botlhoko thata.”

Ashley a tlaleletsa ka tshwaelo ya gagwe, “Ke na le bolwetse ba go fetoga maikutlo kgapetsakgapetsa. Bo ama boitekanelo jwa monagano wa me, mme ke tshwanetse go bo tseela melemo.Ke nako nngwe ke ikutlwa ke tlhoafetse thata, kgotsa ke le tenegile thata. Ka nako nngwe maikutlo a me a fetoga ka bonako. Go thata go laola maikutlo a me.”

“Ke leboga go re bolelela ka maitemogelo a lona. A go nnile le se se molemo ka nako ya leroborobo?” Vincent a botsa.“Ke kgonne go nna le nako e ntsi le balelapa la me. Re tshamekile mmogo metshameko ya boto, ke ne ka itumelela seo,” ga bua Lina.

“Le nna ke nnile le nako e ntle le balelapa. Ka lesego ke kgonne go ikalafa mo gae,” Mulalo a araba.“Ke ne ka nagana go dirisa nako e, jaaka tšhono ya tokafalo. Ke ne ka tshwaragana le lelapa. Ke ne gape ka boela kwa Modimong ka rapela,” ga bua Ashley.

Vincent a tlhola nako mo lebotaneng la ntlokgaso. “Ka maswabi, nako ya rona e a fela!” a bua.“Go bana ba bangwe ba le bona ba tshwerweng ke bolwetse ba monagano kgotsa go sa itekanela mo mmeleng, ke mafoko afe a le ka ba rotloetsang ka ona?” Vincent a botsa.

Ashley a araba wa ntlha, “Go na le ntlha e e seng nnete ka koo ya batho ba ba nang le bolwetse kgotsa bokoa ba tlhaloganyo.O bonwa jaaka e kete o setsenwa kgotsa o batla go bonwa, mme ke batla seo se fetoge. Ga go molato fa o ikutlwa o sa siama.”

Lina a dumela ka gore, “Kgakololo ya me go ba bangwe ke gore re itshole bonolo. Nna pelotelele ka bowena. O dire ka thata ka fa o kgonang.”Mulalo a tlatsa, “Gape o se ke wa lapa! Go na le dikgwetlho fela o sa ntse o ka fitlhelela ditoro le dikeletso tsa gago.”