Vincent ke mmegi wa seteišene sa Radio RX. O ka studiong go gatiša lenaneo la gagwe.Lehono, lenaneo la Vincent le bolela ka bana bao ba phelago le seemo seo se hlobaetšago sa maphelo.O swere dipolelotherišano le bona mabapi le maitemogelo a bona ka nako ya leuba la Covid-19.

“Dumelang batheeletši, yo ke Vincent mo studiong sa Radio RX. Lehono baeng ba ka ke Mulalo, Ashley le Lina,” gwa realo Vincent.Baeng ba a itsebiša.Vincent a iša pele, “Leuba la Covid-19 e be e le tlhobaboroko kudu go batho bao ba phelago ka malwetši a mangwe a kotsi. Re kgopela go re nke le hlalošetše batheeletši ka taba ye.”

Mulalo a thoma, “Ke na le bolwetši bja go se alafege bjoo bo bitšwago atrophy ya mešifa ya mokokotlo. Bjona bo hlasela mešifa ya ka, maoto, matsogo le go hema ga ka.Ge nkabe twatši ya Corona le bolwetši bja ka di kopane, nkabe di ntšeetše bophelo! Maswafo a ka a a fokola, ka gona twatši ye nkabe e fetile ka bophelo bja ka.

Lina a re, “Le nna ke be ke tšhogile. Ke tshwenywa ke asma, yeo e hlaselago maswafo a ka.Ge ke gohlola goba ke hemela godimo, ke be ke se na nnete ya go re ke asma goba ke twatši ya Corona. Seemo se nkabe se hlasetše maswafo a ka la go šiiša.”

Ashley a tlaleletša ka tša gagwe, “Nna ke na le bolwetši bja tšharakano ya megalatšhika (bipolar disorder). Bolwetši bjo bo hlasela go phela gabotse ga maikutlo a ka. Ke swanetše go phela ka go nwa dihlare gore seemo se se kaonafale.Ka nako ye nngwe ke kwa ke nyamile kudu goba ke kgopišegile kudu. Ka nako ye nngwe maikutlo a ka a fetoga ka lebelo. Go ba boima go laola maikutlo a ka.”

“Re leboga ge le abelane le rena maitemogelo a lena. Na ekaba ke eng se se botse seo le itemogetšego sona ka nako ya leuba le?” Vincent a botšiša.“Ke ile ka kgona go fetša nako ye ntši le ba lapa la gešo. Re be re raloka dipapadi mmogo ebile ke tloga ke ipshina ka nnete,” Lina a realo.

“Le nna ke be ke fetša nako ye ntši ke na le ba lapa la gešo. Mahlatse ke go re ke be ke kgona le go ikalafa ka gae,” Mulalo a fetola.“Ke tšere sephetho sa go šomiša nako ye ka mokgwa wa maleba. Nna le ba lapa re kgonne go ba ngata e tee. Ke ile ka sokologela go Modimo, ka rapela,” Ashley a realo.

Vincent a lebelela sešupanako lebotong la ka studiong gomme a re: “Ka bomadimabe nako e re dutše ka phefong!”“Na le ka hlohleletša bjang bana ba bangwe bao go šetšwego go utollotšwe gore ba na le malwetši a monagano goba a mmeleng?” Vincent a botšiša.

Ashley a araba pele, “Batho ba e tšea gore ke dihlong go swarwa ke bolwetši bja monagano.O tšewa bjalo ka motho yo a hlakanego hlogo goba yo a nyakago go bonwa. Ke nyaka go fetoša seo. Go lokile go ba maemong a go se loke.”

Lina a dumela a re, “Keletšo ya ka go ba bangwe ke go re o ikamogele. O se ke wa iphelela pelo. O dira bokaone bjo o ka bo kgonago.”Mulalo a tlaleletša, “Gape o se ke wa ineela! Le ge go na le mathata, efela o ka kgona go fihlelela ditoro tša gago.”