Document

Kubika ngesikhatsi se-lockdown

African Storybook

Khanyisa Masemola

Lona ngumsakato weSiteshi se-RX Radio losakatela e-Red Cross Children's Hospital eKapa.

I-RX Radio siteshi semsakato lesiphetfwe bantfwana, nalesentelwe bantfwana. Bavame kusakatela eStudio lesikhona lapha kulesibhedlela.

Le-Studio besivaliwe ngesikhatsi se-lockdown.

Lona ngu-Akhona. Ungumbiki wetindzaba te-RX Radio.

Ngesikhatsi se-lockdown, Akhona wehlulekile kwetfula luhlelo lwakhe etindlini tekusakata te-RX Studio.

Eluhlelweni lwakhe lwemsakato, Akhona ucocisana nebantfu ngetinkinga letibatsintsako.

Bekanesifiso sekubika ngemitselela ye-lockdown emphakatsini wakubo.

Kepha ngenca ye-lockdown, Akhona wehlulekile kucocisana nebantfu buso nebuso.

Ubese wacela emalunga emphakatsi wakubo lanetincingo kutsi amtfumelele emavi emilayeto.

Ngemuva kwaloko, Akhona urekhode loluhlelo asekhaya asebentisa lucingo lwakhe. Nayi leminye imilayeto latfunyelelwe yona.

Umlayeto wathishela Thuli:

“Maye! Ngikhumbule bafundzi bami! Ngibatfumelela umsebenti wesikolo ngisebentisa licembu le-WhatsApp lenginalo nebatali babo.

Kepha umphakatsi lengifundzisa kuwo uphuyile lokwenta kube lukhuni mbamba ngalabanye batali kutsi bangene ku-intanethi. Loku kuyinsayeya.”

Umlayeto waRiaz:

“Ngikhatsatekile ngemphilo yami. Bantfu labaphila nekukhubateka bavame kuba nemasotja emtimba labutsakatsaka. Njengemuntfu lohamba ngesihlalomasondvo, akuhlali kumelula kuwasha tandla kepha emalunga emndeni wami alusito kakhulu.

Ahlale acinisekisa kutsi nginayo isanithayiza yekusula tandla.”

Umlayeto waKhethiwe:

“Umndeni wakitsi mkhulu, futsi emkhatsini wetfu kukhona labo labenta imisebenti lebalulekile emphakatsini, kepha kwanyalo abahlali natsi.

Sichubeka sithandazela kuphepha kwabo, kanye nekwetfu.”

Umlayeto waGogo Gabbie:

“Angisiye thishela, kepha nyalo sengigucuke thishela webantfwana lababili ekhaya. Bobabili badzinga kunakwa lokufananako.

Ngenca yaloko, simo ekhaya siyacindzetela kakhulu. Ngenhlanhla, tsine sine-WiFi lengenamkhawulo.”

Umlayeto waBuhle:

“Mine i-lockdown isengakangitsintsi kangako ngobe ngingumuntfu lohlala asendlini. Ngiphuma kuphela nangiya esikolweni nasesontfweni.

Ngitsintseke kuphela ngesizatfu sekutsi sengishaywa ngumoya khona lapha ebaleni lami kuphela.”

Umlayeto waLwazi:

“Inkinga lenkhulu lengibukene nayo yekufundza kwami. Ngetayele kufundziswa ngumuntfu lengimbona ngemehlo eme embi kwami.

Kulukhunyana kufundziswa nguthishela lomlalele elucingweni nome lombona kuvidiyo.”

Akhona ukhetsa imilayeto lotawuyisebentisa eluhlelweni lwakhe, bese urekhoda luhlelo lwakhe.

“Sanibonani, lona ngu Akhona, nginetfulela umbiko ngisekamelweni lami. Kungase kungevakali kahle.

Lamuhla sitawutfola litfuba lekuva kutsi batali, bothishela nebantfwana babhekana njani ne-lockdown...”

——Imibuto

Bhala inchazelo yalamagama: bantfu labaphuyile, emasotja emtimba, lokungenamkhawulo.
Nguyiphi insayeya Thishela Thuli labukane nayo?
Yini leyenta Riaz akhatsateke ngemphilo yakhe?
Yini leyenta Gogo Gabbie acindzeteleke?
Ungatsini kute usite Thishela Thuli, Riaz naGogo Gabbie?
Fundza ngetindlela letisihlanu Inhlangano Yesiphambano Lesibovu.
Umndeni wakho ungakusekela kanjani ngemsebenti wesikolwa?
Chaza tinzuzo letimbili tekufundza thishela eme embikwakho.

——

Lencwadzi yetindzaba isekelwe embikweni wesiteshi semsakato lokutsiwa yi-RX. I-RX Radio siteshi semsakato sebantfwana lesiku-intanethi, lesisungulwe saphindze sakhelwa bantfwana.

I-RX Radio isakatela e-Red Cross War Memorial Children's Hospital eKapa.

I-RX Radio isita bantfwana bacoce ngetintfo letibalulekile kubo.

Vakashela i-RX Radio

Your attribution should include the following:
Title: Kubika ngesikhatsi se-lockdown
Author/s: African Storybook
Translator/s: Simangele Khoza
Illustrator/s: Khanyisa Masemola
Assurer/s: Mduduzi Benjie Shongwe
Language: Siswati

© Zenex Foundation - Saide 2025

CC BY includes the following elements:
BY

– Credit must be given to the creator