Document

Pego ka kiletšo ya mesepelo

African Storybook

Khanyisa Masemola

Mo ke setudiong sa Radio RX go tšwa Bookelong bja Bana bja Red Cross War Memorial go la Kapa.

Radio RX ke seteišene sa radio seo se sepetšwago ke bana, ebile ke sa bana. Gantši ba gaša go tšwa setudiong seo se lego bookelong.

Fela ka nako ya kiletšo ya mesepelo, setudio se be se tswaletšwe.

Yo ke Akhona. Ke mmegi wa Radio RX.

Ka nako ya kiletšo ya mesepelo, Akhona o be a sa kgone go gatiša lenaneo la gagwe ka setudiong sa RX.

Lenaneong la gagwe la seyalemoya, Akhona o swara dipolelotherišano le batho ka ditabana tšeo di ba amago.

O be a nyaka go bega ka maitemogelo a batho mabapi le kiletšo ya mesepelo mo motseng wa gabo.

Ka lebaka la kiletšo ya mesepelo, Akhona o paletšwe ke go swara dipolelotherišano le batho ka sebele.

Ka gona, o ile a kgopela batho ba motse wa gabo gore ba šomiše dillathekeng go gatiša le go mo romela melaetša.

Ye mengwe ya melaetša yeo a e hweditšego ke ye.

Molaetša wa morutiši Thuli:

“Ke hlologetše barutwana ba ka kudu! Nna le batswadi ba bona re hlamile polatefomo ya sehlopha sa go boledišana ka Whatsapp. Ke kgona go ba romela mošomo wa bana mo sehlopheng se.

Efela ke ruta lefelong leo bohloki bo atilego, ka gona ga se batswadi ka moka bao ba kgonago go fihlelela tirelo ya inthanete. Seo ke bothata.”

Molaetša wa Riaz:

“Ke tshwenyegile ka bophelo bja ka. Gantši batho bao ba nago le bogolofadi, mašole a bona a mmele ga a na maatla.

Bjale ka ge ke dutše godimo ga leotwana, ga ke kgone go hlapa matsogo a ka kgafetša-kgafetša, efela ba lapa la ka ba nthuša kudu.

Ba netefatša gore ke phela ke na le sebolayaditwatši ka dinako ka moka.”

Molaetša wa Khethiwe:

“Lapa la gešo ke le legolo kudu. Magareng ga rena go na le bašomi bao ba hlokegago ka dinako tšohle efela ga ba dule le rena gabjale.

Seo re se dirago ka mehla ke go rapelela polokego ya bona le ya rena.”

Molaetša wa Koko Gabbie:

“Ga ke morutiši, efela gabjale ke swanetše go ruta bana ba babedi ka gae. Bobedi bja bona ba nyaka tlhokomelo ya go swana.

Ka gona, seemo ka gae se tloga se na le kgatelelo ye kgolo. Mahlatse ke gore re na le WiFi ya go se kgaotšwe.”

Molaetša wa Buhle:

“Kiletšo ye ya mesepelo ga se ya nkama gakaalo ka lebaka la go re ke phela ke le ka gae. Ke tšwa ka gae ge fela ke eya sekolong goba kerekeng.

Kiletšo ya mesepelo e nkamile ka tsela ya go re ke hwetša fela moya wa go hlaboša ka jarateng.”

Molaetša wa Lwazi:

“Bothata bjo bogolo bjo bo tšweletšego bo nepiša dithuto tša ka sekolong. Ke be ke tlwaetše go ba le morutiši ka sebele mo pele ga ka.

Go boimanyana go theeletša mogaleng goba go bogela bidio ya morutiši.”

Akhona a kgetha ye mengwe ya melaetša yeo a ka e šomišago lenaneong la gagwe. Ke moka, a gatiša lenaneo la gagwe.

“Dumelang, yo ke Akhona, ke bega go tšwa phapošing ya ka ya borobalelo. Boleng Boleng bja modumo e ka no se tšwelele gabotse.

Lehono re tla kwa ka mokgwa woo batswadi, barutiši le bana ba lebelelanego le kiletšo ya mesepelo.”

——Dipotšišo

Ngwala tlhalošo ya mantšu a: go hloka, mašole a mmele, go se kgaotšwe.
Na ke bothata bofe bjoo Morutiši Thuli a nago le bjona?
Ke ka lebaka la eng Riaz a belaetšwa ke tša maphelo a gagwe?
Ke ka lebaka la eng Koko Gabbie a ikwa a gatelegile?
Na ke maele afe ao o ka thušago Morutiši Thuli, Riaz le Koko Gabbie?

——

Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.

Seteišene se, se gašwa go tšwa Bookelong bja Bana bja Red Cross War Memorial go la Kapa.

Radio RX e thuša bana go anega dikanegelo mabapi le ditaba tšeo di lego bohlokwa mo go bona.

Etela RX Radio

Your attribution should include the following:
Title: Pego ka kiletšo ya mesepelo
Author/s: African Storybook
Translator/s: Dikeledi Queen Shai
Illustrator/s: Khanyisa Masemola
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
BY

– Credit must be given to the creator