E ne e le phakela kwa lefelong la diphologolo, mme Henny motlhokomedi wa diphologolo o ne a iketlile ka mogodungwana.Kwa lesakaneng, batlhokomedi ba lebelela bana ba diphologolo tse di tlhokang tlhokomelo e e kgethegileng. Motlhokomedi Henny o ne a emetse ngaka ya diphologolo go goroga.

Ngaka Nosiso ke ngaka ya diphologolo yo o alafang diphologolo tse di tlhaga. O ne a etetse lefelo la diphologolo go bona mangaunyana a mararo a a sa tswang go tsalwa.Fa Ngaka Nosiso a se na go tlhatlhoba masea, batlhokomedi ba diphologolo, Henny le Ann ba a fepa.

Fa helikoptara ya lefelo la diphologolo e dikologa go tlhatlhoba, mofofisi a lemoga namane ya tlou e robetse fa fatshe. Tloana e ne e idibetse.Helikoptara e ne ya tsaya Ngaka Nosiso le motlhokomedi Henny go ba fofisetsa kwa tloaneng.

“Tloana e tlhoka go ya kwa bookelong ba diphologolo ka bonako!” ga bua Ngaka Nosiso.Batlhokomedi ba baya namane mo seporeng. Helikoptara ya fofisetsa tloana kwa bookelong.

Fa tloana e setse e tswile mo kotsing, ya boela kwa lesakaneng.“O tshwanetse go bo o ntse malatsinyana kwa ntle ga metsi,” ga bua motlhokomedi Henny fa a ntse a e fepa.

Morago ga dibekenyana, namane ya gola mme ya tia. Ya gola ya nna tloana e e matlhagatlhaga eo e neng e rata go tshameka mathaithai mo batlhokomeding.Tloana e ne e rata motlhokomedi Henny thata!

Bosigo bongwe lori e ne ya tlisa thutlwana e e lwalang kwa lefelong la diphologolo.Batlhokomedi ba botlhe ba ne ba tshwanela go thusa go sutisetsa namane ka pabalesego kwa lesakaneng.

Ngaka Nosiso a kwala melemo ya thutlwa.Botlhe ba ne ba tshwenyegile ka maemo a phologotswana e, gonne e ne e palelwa ke go ikemisa.

Mo dikgweding, ngwana wa thutlwa a gola go tia le go nna motelele.Motlhokomedi Henny, a simolola go dirisa llere go fepa namane e e golang.

Ka sebakanyana, diphologolo tse di itekanetseng di tla boela kwa lefelong la diphologolo. Mme ga jaana, di itumelela go tshameka mmogo kwa lesakaneng.Diphologolo di botlhokwa fela jaaka batho ba ba di tlhokomelang.