Re ka se raloke mmogo
African Storybook
Simon Mokoena
Sepedi
First paragraphs
Morutiši Tshezi le phapoši ya gagwe ba bolela ka leuba la Covid-19.
-
Morutiši o re, “Ke nyaka go kwa ka nako ya lena ya kua gae. Na ka moka ga lena le ile la kgona go šoma ge sekolo se be se tswaletšwe?”
1
Dudu a ba wa mathomo wa go araba, “Go be go le bothata mo go nna go ithuta ka gae. Lebaka ke go re batswadi ba ka ba a šoma gomme nna ke šala ke le noši ka gae,” a realo.
-
“Le nna ke swanelwa ke go dira mošomo wa sekolo ka noši,” Msizi a realo.
2
A tšwela pele, “Ke be ke se na motho wa go nthuša, go be go se na yoo a ntlhalošetšago dipotšišo le ditaelo.”
-
Barutwana ba bantši ba dumelelana le yena.
-
“Go šomiša inthanete go be go le bothata ka lebaka la gore e bitša theko ya godimo,” Dudu a realo.
-
Barutwana ba dumela gape.
3
Ayanda yena a re, “Moo ke dulago gona go be go na le mašata kudu ke sa kgone go bala.”
-
“Ke be ke thabile kudu ge re botšwa gore re boela sekolong,” Faiza a realo.
-
“Yo mongwe le yo mongwe o be a thabile!” Msizi a sega.
4
“Ke be ke sa nyake gore dikolo di bulwe,” Ayanda a belaela a realo.
-
“Ke be ke nagana gore ge re boela sekolong dilo di tla swana le ka mokgwa woo di bego di le ka gona peleng. Efela dilo ka moka di be di fetogile!” Amahle a tšwela pele.
5
“Re itlwaetša go šia sekgoba seo se beilwego magareng ga rena, re swanetše go apara dimaseke le go šomiša sebolayaditwatši sa matsogo,” Isaac a belaela.
-
“Barutiši ba phela ba re botšiša go re, “Na o a gohlola, na megolo ya gago e bohloko?” Ayanda a realo.
6
Kagiso a forohla matsogo a gagwe a re, “Ka mehla ge o fetša go ngwala selo letlapeng ba go fa sebolayaditwatši sa matsogo.”
-
“Re swanetše go phela re rwele lepotlelwana la sebolayaditwatši,” a buša moya.
7
“Kua sekolong ka nako ya go khutša, ga go sa swana le pele moo re bego re kgobokana goba re raloka papadi mmogo,” Msizi a realo.
-
Ayanda a re, “Go boima kudu ka lebaka la gore re be re tlwaetše go raloka le bagwera ba rena.”
8
Amahle a re, “Rena bjale ka bana, re rata bagwera le go ba kgauswi le bona.”
-
“Efela gabjale, re ka se kgone go raloka le bagwera ba rena,” Dudu a realo.
-
“Bjale ke taba ya go šia sekgoba seo se beilwego magareng ga rena,” Isaac a realo.
9
Morutiši Tshezi a re, “Go na le diphetogo tše dintši.”
-
Le ge seemo se le bjalo, ga o noši, re mmogo.
-
“Le ge re ka se kgone go raloka mmogo gabjale, re ka phela re abelana dikgopolo le maikutlo a rena,” a tlaleletša a realo.
10

——Dipotšišo


  1. Na o be o ikwa bjang ge o be o dutše gae ka nako ya kiletšo ya mesepelo? Hlaloša.
  2. Hwetša mantšu ka gare ga kanegelo ao a ganetšago a: homola, nyama, dikarabo, bonolo.
  3. Hwetša mantšu ka gare ga kanegelo ao a hlalošago selo se tee le a: tura, barutwana, nyakalla, thaka.
11

——


Pukukanegelo ye e theilwe godimo ga dipego tša bana tša Radio RX. Radio RX ke seteišene sa seyalemoya sa inthanete sa bana seo se tšweletšwago le go diragatšwa ke bana, ba direla bana.
-
Seteišene se, se gašwa go tšwa Bookelong bja Bana bja Red Cross War Memorial go la Kapa.
-
Radio RX e thuša bana go anega dikanegelo mabapi le ditaba tšeo di lego bohlokwa mo go bona.
-
Etela RX Radio
12
Attribution CC BY
Your attribution should include the following:
Title: Re ka se raloke mmogo
Author/s: African Storybook
Translator/s: Dikeledi Queen Shai
Illustrator/s: Simon Mokoena
Assurer/s: Connie Makgabo
Language: Sepedi

© Zenex Foundation - Saide 2024

CC BY includes the following elements:
 BY   – Credit must be given to the creator