UXikochimani wavuka ngesamarimarima ekuseni kwamhlokho.Waba mumuntu wokuthoma esitobheni sebhesi nerengeni yamateksi.Leli bekulikhambo likaXikochimani lokuthoma ayedwa.

Wabe asiya kubamkhulwakhe, uGalela, edorobheni. Msinyazana indoda yabiza amabizo weendawo uXikochimani awakhumbulako.“Yewize, ibhesi iyakhamba!” kumemeza indoda.

Ibhesi pheze besele igcwele. UXikochimani wajama alindele inomboro yethikithi lakhe ukobana ibizwe.Umsana bekaqabe umnyango webhesi.UXikochimani wazizwa asilingeka.

Isihlalo sakaXikochimani bekungileso esingefesdereni, eqadi kweenthandani uRhulani noMadzivandlela.Ngebhesini, bekutjhisa bhe!

Abantu abathengisako bangena balandelene, itjhada labo labe liphezulu khulu!Bebathengisa iinamaneyidi, amabhanana, amaswidi, inyama nokhunye kokulibasiza umlomo.

UMadzivandlela wakhupha imali emabeleni wakhe wathenga isithelo endodeni eyabe inobuso obuhle.Wabeka incwadi yakhe phasi wathoma ukuhlafunya wazizwela ubumnandi.

Umtjhayeli webhesi wangena ngebhesini. Walotjhisa abakhweli. “Ledlhani nithabele ikhambo lenu,” watjho arhuwelela atjela boke abantu.UMzamani wabuyelela elinye nelinye igama umtjhayeli alitjhwileko!

Indlela eya edorobheni yabe iyide begodu izombeleza.UXikochimani wabe athabele ukubona enye indawo ehlukileko lokha ibhesi nayikhambako.

Bekusatjhisa ngebheseni lokha ilanga nalitjhingako. Abantu abakhwelileko bebajulukile begodu baphethwe buthongo.URhulani wakakarela isikhwama sakhe lokha nakafikelwa buthongo.

Msinyazana uXikochimani, uRhulani banoMadzivandlela besele balele.UMadzivandlela warhonela phezulu.Balala baya ngobuthongo lokha ibhesi nayikhambako ebusuku.

Wezwa isandla simusikinya ehlombe kabuthaka, waphaphama uXikochimani.“Lesi sitetjhi sokugcina, kanti wena uya kuphi?” kubuza indoda ehlezi ngemva kukaXikochimani.

UXikochimani wasikima wehla ebhesini.Akhange abone namunye umuntu amaziko.Wazitjela wathi, “Mina nginguXikochimani kaRhulani wakaGalela kaXihimu. Ngizokufika endlini kabamkhulu wami.”