Brenda Fassie, Indlovukati yase-Afrika ye-Pop
Sara Mohale
Khanyisa Masemola
Siswati
Longer paragraphs

——


Ngemhlaka 3 kuLweti, 1964, elokishini laseLanga, eKapa, kwatalwa umhlabeleli lomuhle ngendlela lesimanga. Libito lakhe bekunguBrenda Nokuzola Fassie.
-
Bekateketiswa tigidzi tebalandzeli bakhe ngekutsi ngu-‘MaBrr’.
-
Umndeni wakubo bewuphuyile. Make wakhe bekahlanta tindlu tebantfu kantsi babe wakhe washona ngesikhatsi aneminyaka lemibili nje kuphela budzala.
1
Brenda bekangutfunjana kubantfwana bakubo labayimfica. Make wakhe bekacabanga kutsi utawutfola umfana. Ngesikhatsi kutalwa Brenda, kwadzingeka acabange masinyane ngelibito lentfombatane.
-
Njengobe make waBrenda naye bekangumculi, wancuma kubita luswane lwakhe ngelibito lemhlabeleli waseMelika lobitwa ngekutsiwa nguBrenda Lee.
2
Ngesikhatsi aneminyaka lemine, Brenda bekahlabela emicimbini yasesontfweni. Make wakhe bekashaya iphiyano bese Brenda uyahlabela.
-
Ngesikhatsi asaneminyaka lesitfupha, Brenda bese ahlabela nelicembu lelibitwa ngekutsiwa yi-‘Tiny Tots’ bese abhadalwa tivakashi.
3
Baculi baseKapa bacala kutigcabha ngaBrenda, kusukela aselitjitji.
-
Umcondzisi lodvumile, Koloi Lebona weta watomvakashela. Wafike wajabulela kakhulu livi lakhe lelihle.
-
Ngemva kwaloko Brenda waya eGoli futsi wacalisa licembu ngekushesha, ‘Brenda and the Big Dudes’.
4
Lelicembu lakhipha ingoma leyatsengiswa kakhulu eNingizimu Afrika, letsi ‘Weekend Special’.
-
Balandzeli bakhe emhlabeni wonkhe, labamnyama nalabamhlophe, labasha, nalabadzala, bebabonakala bayidansela lengoma.
-
Lengoma beyijatjulelwa bantfu labanyenti, ikakhulukati ngaboLwesihlanu kuze kuyoba liSontfo!
5
Nga-1998, Brenda wahlangana nemcondzisi wemculo, Chicco Twala. Bakhicita amarekhodi latsengiswa ngemakhophi latinkhulungwane letinyenti aphindze atsengiswa ngemakhophi langetulu kwesigidzi. Lamanye kumarekhodi latsengiswa kakhulu ngulawa ‘Too late for Mama,’ ‘Memeza’, kanye naletsi ‘Nomakanjani’.
-
Lemphumelelo yalandzelwa yimiklomelo yemculo eNingizimu Afrika nakulamanye emave, MaBrr nyalo besekadvume emhlabeni wonkhe!
6
ENingizimu Afrika, Brenda wadvuma kangangekutsi bese kute umcimbi lobewungaba bete ngisho naleyodvwa ingoma yakhe.
-
Ingoma lebeyihlatjelwa kakhulu ngetikhatsi temishado, ngulena letsi ‘Vulindlela’.
-
Kantsi labeyitsandvwa kakhulu lebewungabona balingisela kudansa kwakhe ngayo kanye nesimo sebuso bakhe, ngulena letsi ‘Ag shame lovey’!
7
Balandzeli baBrenda bebamemeta libito lakhe emadzilini emiculo ngesikhatsi basamlindze kutsi avele esiteji.
-
Balandzeli bebahlabela baphindze bakhale ngesikhatsi ahlabela esiteji. Kuva livi lakhe bekubenta baminyetelane baye kubogadzi sebafuna nje kumane bamtsintse!
8
Nga-1990, MaBrr wahlonipha Nelson Mandela, ngengoma letsi ‘Black President’.
-
Bekasesejele futsi leyongoma yagcine seyivaliwe nguhulumende welubandlululo.
-
Loku kwamenta wancuma kuhlabela ngesiZulu, siXhosa nangesiSotho kuphela. Bantfu bamtsandza kakhulu ngalokwengetiwe ngenca yaloku.
9
Nanobe Brenda alifinyelela liphupho lakhe lekuba silomo se-pop, kepha washona asemncane, aneminyaka le-39, ngemhlaka 9 iNkhwekhweti, 2004.
-
Kwaba lilanga lekudzabuka lokukhulu eNingizimu Afrika. Tabetfusa kakhulu bantfu tindzaba tekushona kwakhe. Labanyenti balila ngenca yekulahlekelwa ngulesilomo.
-
Washiya ngemuva indvodzana yakhe, Bongani.
10
Ngemva kwekushona kwakhe, licembu lelikhulu lebalandzela bakhe laphutfuma layotsenga umculo wakhe.
-
Balandzeli bebacabanga kutsi emarekhodi akhe ngeke asaphindze atfolakale.
-
Kucatjangwa kutsi inkampani yatsengisa tinkhulungwane ngetinkhulungwane temakhophi ema-albhamu akhe.
11
E-Newtown, eGoli, kunesitfombe saBrenda lesentiwe ngelitfusi. Sentiwa ngenhloso yekumhlonipha.
-
Eceleni kwalesitfombe lesentiwe kunesitulo sekutsi bantfu bangahlala khona, bachitse sikhatsi naleNdlovukati yase-Afrika ye-Pop.
12
Brenda bekangumculi lonelikhono lelimangalisako lokungasilula kulikhohlwa.
-
Ungulesinye setilomo letinkhulu kakhulu te-pop eNingizimu Afrika futsi ugcugcutele baculi labanyenti.
-
Nyalo, situkulwane lesisha sesenta tingoma letenta wonkhe umuntfu afune kudansa.
13

——Imibuto


  1. Watalelwa kuphi Brenda?
  2. Ucabanga kutsi kungani bacamba licembu ngekutsi, yi-‘Tiny Tots’?
  3. Umculo waBrenda bewubenta bative kanjani balandzeli bakhe? Chaza imphendvulo yakho.
  4. Bekayini hulumende welubandlululo? Tfola kabanti ngaloku.
  5. Dvweba bese ulebula incenye yakho yendzaba loyitsandzako.
14

——


Le ncwadzi yetindzaba icanjwe futsi yabhalwa ngeSepedi, njengencenye yetintfo tekufundza teZenex Ulwazi Lwethu nga-2021.
15
16
Attribution CC BY
Your attribution should include the following:
Title: Brenda Fassie, Indlovukati yase-Afrika ye-Pop
Author/s: Sara Mohale
Translator/s: Mduduzi Benjie Shongwe
Illustrator/s: Khanyisa Masemola
Assurer/s: Simangele Khoza
Language: Siswati

© Zenex Foundation - Saide 2024

CC BY includes the following elements:
 BY   – Credit must be given to the creator