UBrenda Fassie, indlovukazi yomvumo we-Pop e-Afrika
Sara Mohale
Khanyisa Masemola
isiNdebele
Read aloud

——


Mhlana amalanga ama-3 kuSinyikhaba, ngomnyaka we-1964, esikomplasi seLanga eKapa, kwabelethwa umvumi wabavumi. Ibizo lakhe kwakunguBrenda Nokuzola Fassie.
-
Iingidigidi zabalandeli bakhe bamthiya ibizo ‘likaMabrrr.
-
Umndeni wakhe wabe utlhaga. Unina wabe angunomakhwitjhi begodu uyise wahlongakala lokha nabekaneminyaka emibili ubudala.
1
UBrenda wabe abuphetjhani ebantwaneni abalithoba. Unina nakazithweleko wacabanga bona uzithwele umsana. Lokha uBrenda nakabelethwako, unina kwafanele bona acabange ibizo msinya.
-
Njengombana naye wabe amvumi, unina kaBrenda wabona kungcono athiye umntwanakhe ngomvumi we-Amerika obizwa ngoBrenda Lee.
2
Nasele aneminyaka emine, uBrenda wabe avuma eminyanyeni yesondweni. Unina wabe alilisa ipiyano bese uBrenda yena uyavuma.
-
Wathi nasele aneminyaka esithandathu, uBrenda wabe sele avuma ebhendeni, elalibizwa ‘i-Tiny Tots’, avuma lapho begodu abhadalwa ziimvakatjhi ezibuya eenarheni zangaphandle.
3
Wathi lokha nasele alitlawana, boke abavumi eKapa besele bakhuluma ngaye.
-
Umvezi womvumo owabe adumile, uKoloi Lebona weza wazomvakatjhela. Wathatjiswa khulu liphimbo lakhe elimnandi.
-
Ngemva kwalokho uBrenda wafuduka waya eJwanasbhege, msinyazana nje wabumba isiqhema sakhe, ‘iBrenda and the Big Dudes’.
4
Isiqhema sakhupha ingoma eyathengisa khulu ebeyitjhisa iinkhotha eSewula Afrika, ethi ‘Weekend Special’.
-
Abalandeli bakhe ephasini mazombe, abamhlophe nabanzima, abadala nabancani, bebabonwa bajidela ingoma le.
-
Njengombana ibizo layo lizitjho. Ingoma le yabe ithandwa babantu abanengi, khulukhulu ukusukela ngaboLesihlanu ukuya ngaboSondo!
5
Ngomnyaka we-1998, uBrenda wasebenza nomvezi womvumo, uChicco Twala. Bobabili bakhiqiza amarekhodi athengisa iinkulungwana zamakhophi, woke njalo abe amaplathinamu. ‘I-‘Too late for Mama,’ i‘Memeza’, ne ‘Nomakanjani’ kwabe kungezinye zakhona ezabe zithengwa njengamatjhatjhatjha atjhisako.
-
Ipumelelo le yalandelwa bonongorwana bomvumo ababathola eSewula Afrika neetjhabatjhabeni. Njenganje uMabrr besele adume iphasi loke!
6
ESewula Afrika uBrenda wabe adume khulu, eminyanyeni bewungeze wathola ingekho nayinye ingoma yakhe eliliswako.
-
Ingomakhe ethi, ‘Vulindlela’ ngiyo eyayivunywa khulu emitjhadweni.
-
Le ethi, Ag shame lovey,’ yabe ithandwa khulu bantwana, labo owabe ubathola balingisa iingoma zakhe nangendlela abe ajida ngayo uMabrr!
7
Emakhonsadini wabe uthola abalandeli bakaBrenda bamemeza ibizo lakhe lokha nabasalinde bona azokuvuma esiteji.
-
Abalandeli bakhe bebabonakala bavuma begodu balila nokulila lokha uMabrr nakavumako. Ukuzwa iphimbo lakhe bekubenza bafune nokusunduza nabonogadi ukuze bayombamba ngezandla!
8
Ngomnyaka we-1990, uMaBrr watjengisa ukuhlonipha ubaba uNelson Mandela ngengoma eyatjhisa amadamu anamanzi ethi, ‘Black President’.
-
UMandela wabe asesengaphakathi ejele, ingoma leyo umbuso webandlululo wathi awufuni ukuyizwa ivunywa.
-
Lokho kwamenza ukobana athathe isiqunto sokuvuma ngesiZulu, ngesiXhosa nangesiSutho kwaphela. Abalandeli bakhe bamthanda ukudlula ngaphambilini.
9
Nalokha uBrenda aphumelela ebhudangweni lakhe lokuba mvumi okhamba phambili, wahlongakala msinya khulu, aneminyaka ema-39, mhlana amalanga ali-9 ngenyanga kaMrhayili, ngomnyaka we-2004.
-
Kwaba lilanga elibuhlungu khulu eSewula Afrika umuthi lo nawuwako. Abantu bathukwa khulu nabezwa iindaba zokudlula ephasini kwakhe. Inengi lazila nokuzila.
-
Watjhiya ephasini indodanakhe, uBongani.
10
Ngemuva kokuhlongakala kwakhe, abantu abanengi bagijima msinya bayokuthenga iingoma zakhe.
-
Abalandeli bakhe bebacabanga bona iingoma zakhe angeze zisatholakala.
-
Kucatjangwa bona ikhamphani yathengisa iingidi neengidi zamakhophi womvumo wakhe ngaleso sikhathi.
11
UBrenda wahlonitjhwa ngesithombe sakhe esabekwa eNewtown eJohannesburg. Sabe senzelwe ukuhlonipha umakekere lo.
-
Eduze kwesithombeso kunesitulo ukobana abantu bahlale phasi bakhulume naye umakekere womvumo we-Pop ongewe-Afrika.
12
UBrenda wabe amvumi ohlakaniphe tle esingeze samlibala nanini nanini.
-
Ungomunye wabomakekere babavumi abakhamba phambili begodu wakhuthaza abavumi abanengi.
-
Nanje, abantu basazithabela iingoma zakhe, okungilezo ezenza umuntu afune ukusikima ajide.
13

——Imibuzo


  1. Wabelethelwa kuphi uBrenda?
  2. Ucabanga bona kuba yini bathiya ibizo lesiqhema ngokuthi yi ’Tiny Tots’?
  3. Umvumo kaBrenda bewenza abalandeli bakhe bazizwe njani? Hlathulula ipendulwakho.
  4. Bewuyini umbuso webandlululo? Tlola okunengana ngawo.
  5. Dweba uleyibule ingcenye oyithanda khulu yendatjana.
14

——


Indatjana esencwadini le yabunjwa begodu yatlolwa ngelimi leSepedi, njengengcenye yephrojekthi yamamatheriyali wokufunda we-Zenex Ulwazi Lwethu we-2021.
15
16
Attribution CC BY
Your attribution should include the following:
Title: UBrenda Fassie, indlovukazi yomvumo we-Pop e-Afrika
Author/s: Sara Mohale
Translator/s: Sponono Mahlangu
Illustrator/s: Khanyisa Masemola
Assurer/s: Translator: William Jiyana
Language: isiNdebele

© Zenex Foundation - Saide 2024

CC BY includes the following elements:
 BY   – Credit must be given to the creator