Eka ndhawu yin’wana etlhelo ka nambu wa Limpopo, a ku tshama Simangaliso.Ku tshembiwa leswaku Simangaliso a ri na matimba yo hlawuleka.Munhu un’wana na un’wana exidorobanini xa ka vona u vulavula hi yena.

Simangaliso u na rito ro saseka. U tshama enhoveni laha a yimbelelela swinyanyana na swiharhi.U yimbelela emakumu ka siku rin’wana na rin’wana. Vanhu va suka ekule ku ta yingisela rito ra yena ro nyanganya.

Simangaliso u na misisi yo leha leyi na munhu na un’we a nga si tshamaka a yi vona. U kota ku cinca misisi ya yena hi ku tsakela ka yena. U kota ku endla leswaku yi nyamalala na ku tlhela yi vuya.Mikarhi hinkwayo loko a yimbelela, misisi ya wa yi pfala xikandza xa yena.

Siku na siku Simangaliso u famba na nhova hinkwayo.U kota ku twa na ku nuhetela khombo.U kota ku swi twa loko munhu a ta eka yena hi leswo biha.

Siku rin’wana Simangaliso u kunguhatile ku kumisisa leswaku vutomi byi njhani etlhelo lerin’wana ra nambu.U kunguhatile ku teka riendzo.Loko a hlangana na nambu lowukulu, u hlamarile,‘’Xana ndzi tsemakanyisa ku yini?”

Simangaliso a ehleketa swa xinkadyana ivi a huwelela, ‘’Matimba! Matimba!’’Hi ku copeta ka tihlo, ku humelela buloho.U tsemakanye nambu ku ya eka tlhelo lerin’wana ivi a ya emahlweni na riendzo. U fambe mpfhuka eka nhova leyi a yi tiva.

Simangaliso a titwa a karhele. ‘’ndzi lava ndhawu yo wisa,’’ a ehleketa.A huwelela, ‘’Matimba! Matimba!’’Hi ku copeta ka tihlo, byanyi byi humelela ekusuhi na yena. Simangaliso a tshama eka byanyi byo saseka.

Simangaliso a twa ndlala. ‘’Ndzi le kule na le nhoveni. Xana ndzi ta swi kuma njhani swakudya?’’a ti vutisa.A nantswa milomo ya yena ivi a huwelela, ‘’Matimba! Matimba!”Hi ku copeta ka tihlo, mapoto yo pfumala nchumu, swibye na tikhapu swi humelela.

Swakudya na swonwa leswi Simangaliso a swi tsakelaka swi wela endzeni ka mapoto, swibye na tikhapu.A dya na ku nwa hi ku rhandza.Hi xinkadyana a twa mpfumawulo.

Simangaliso u twile vukona bya mina ndzi nga si fika ekusuhi na yena.A huwelela, ‘’I mani?Ndzi vulavula hi rito leritsongo, “Hi mina. Vito ra mina I Buumi.’’Simangaliso u swi tivile leswaku ndzi tile hi leswinene.

‘’Ndzi lahlekile,’’ ndzi vulavula hi rito leritsongo.“Tana u ta dya no nwa na mina!” Simangaliso a rhambiwa.Ndzi nwile ndzi dya hi ku rhandza.Ndzi byela Simangaliso leswi ndzi nga lahlekisa xiswona loko ndzi landzelela buti wa mina.

Simangaliso u ndzi byerile hi riendzo ra yena ra ku ya kumisisa leswaku vutomi byi njhani eka tlhelo lerin’wana ra nambu.Ivi a n’wayitela a huwelela, ‘’Matimba! Matimba!’’Ivi hi ndlela yaleyo ndzi fika emahlweni ka rivanti ra yindlu ya vatswari va mina.