Mo nageng e e kwa moseja ga noka ya Limpopo, go nna Simangaliso.Go dumelwa gore Simangaliso o na le maatla a a kgethegileng.Mongwe le mongwe mo toropong ya rona o bua ka ene.

Simangaliso o na le lentswe le le monate le le sidilang. O nna kwa sekgweng kwa a opelelang dinonyane le diphologolo.O opela mo bokhutlong ba letsatsi le letsatsi. Batho ba tsamaya go tswa kgakala go tla go reetsa lentswe le le molotsana la gagwe.

Simangaliso o na le moriri o moleele o ope a iseng a nne le one. O kgona go fetola moriri wa gagwe jaaka a rata. A ka dira gore o nyelele kgotsa o bonale.Fa a opela, moriri o wela mo sefatlhegong go se khurumetsa.

Simangaliso o tsamayatsamaya mo sekgweng letsatsi le letsatsi.O kgona go utlwa le go dupelela kotsi.O kgona le go lemoga fa mongwe a tla kwa go ene ka tsietso.

Letsatsi lengwe Simangaliso o ne a ikaelela go batlisisa gore botshelo bo ntse jang kwa moseja ga noka e kgolo.O ne a swetsa go tsaya leeto.Fa a fitlha fa nokeng e kgolo, o ne a gakgamala, ‘Ke tla kgabaganya jang?”

Simangaliso a nagana ka motsotswana mme a goeletsa, “Maatla! Maatla!”Ka bonako, go ne ga tlhagelela borogo.O ne a kgabaganyetsa kwa moseja ga noka mme a tsweletsa leeto. O ne a tsamaela kgakala le sekgwa se a se tlwaetseng.

Simangaliso a utlwa letsapa. “Ke batla fa nka ikhutsang teng,” a nagana.A goeletsa, “Maatla! Maatla!Ka bonakonako, tlhaga ya tlhagelela go mo dikologa. Simangaliso a nna fa fatshe mo tlhageng e e tsidifetseng.

Simangaliso a utlwa tlala. “Ke kgakala le sekgwa. Ke tla bona jang dijo?” a nagana.A latswa dipounama tsa gagwe mme a goeletsa, “Maatla! Maatla!”Ka bonakonako, dipitsa, dijana le dikopi tse di lolea tsa tlhagelela.

Dijo tse di rategang tsa ga Simangaliso tsa wela mo dipitseng, dijana le dikopi tse di lolea.O ne a ja le go nwa go ya ka moo a batlang.Ka bonakwana, a utlwa modumo.

Simangaliso o ne a nkutlwa pele ke tlhagelela.A bitsa, “Ke mang foo?”Ka bua ka lentswe le lennye, “Ke nna. Leina la me ke Buumi.”Simangaliso o itsile gore ke na le maikaelelo a a molemo.

“Ke latlhegile,” ka bua ka lentswe le lennye.Tlaya o je le go nwa le nna!” Simangaliso a ntaletsa.Ke ne ka ja le go nwa jaaka ke batla.Ke ne ka bolelela Simangaliso gore ke latlhegile jang morago ga go sala nkgonne morago.

Simangaliso o ne a mpolelela ka leeto la gagwe la go batlisisa ka ga botshelo kwa moseja ga noka.Fela a nyenya a goeletsa, “Maatla! Maatla!”Mme ke ka moo ke gorogileng ka teng kwa mojakong wa kwa pele wa ntlo ya batsadi ba me.