ULihle noLwandle eTwasahlobo
Tebogo Boikanyo Matshana
Tebogo Matshana
isiNdebele
First paragraphs
ULihle noLwandle baseTlhagwini Kapa bayokuvatjhela umzawabo, uLina.
-
ULina uyabathatha uyobakhombisa amathuthumbo endaweni ebizwa nge-Namaqualand.
1
Abodade laba bakareke khulu!
-
“Iphasi lembeswe mibala ekhanyako!” kubabaza uLwandle.
-
ULina uyamomotheka, “Nakuthoma iTwasahlobo, amathuthumbo amanengi ayathuthumba lapha.”
2
ULina uyaraga, “Ngemva kokuna kwezulu, begodu njengoba amazinga wokutjhisa akhuphuka, amathuthumbo akhula kiyo yoke indawo.”
-
“Kwesikhatjhana esincani, inarha eyomileko le itjhuguluka ibe masimu wamathuthumbo.”
3
“Ngesikhathi seTwasahlobo, umma utjala imbewu esivandeni. Ngubani otjale amathuthumbo la?” kubuza uLwandle.
-
ULina uyamphendula, “Mathuthumbo wemmangweni, akunamuntu owatjalileko.”
4
“I-Namaqualand inemihlobo eminengi ehlukileko yeentjalo, iinlwana, kanye neenunwana,” kutjho uLina.
-
“Ngicabanga bona igama elitjho koke lokho ngelithi bhayodayivesithi,” uLihle uyakhumbula.
-
“Ibhayo bani?” kubuza uLwandle.
5
“Iye ibhayodayivesithi itjho lokha nakunemihlobo eminengi ehlukileko yeenlwana neentjalo endaweni,” kuphendula uLina.
-
“Izinto ezimihlobohlobo eziphilako zenza ipilo ehle ebhodulukweni lemvelo,” kutjho uLihle.
6
Abantazana bakhamba badlula umelusi nemvu yakhe. “Baaaa!” kulila imvu.
-
“Baaaa!” ikhorasi labantazana.
-
“Amalamjana wezimvu amanengi azalwa ngesikhathi seTwasahlobo,” kuyelela uLihle.
7
“Iinlwana ezinengi zizala, nofana ziphandlusela amaqanda, ngesikhathi seTwasahlobo,” kuvuma uLina.
-
“Ngiyabathanda abantwana beenlwana! Kuhle kuhle ithoma nini iTwasahlobo?” kubuza uLwandle.
8
“Kubudisi ukunemba ngeenkhathi zomnyaka,” kuphendula uLina.
-
Uyaraga, “Kodwana ngokujayelekileko lapha sivame ukubona amatshwayo weTwasahlobo ngenyanga kaKhukhulamungu.”
9
“Ubujamo bezulu buthoma ukufuthumala, begodu nezulu liyana,” kutjho uLina
-
“Bese, kwesikhatjhana esincani, irhalawumba iba sivande samathuthumbo wommango,” kumomotheka uLihle.
10

——Imibuzo


  1. Bakuphi aboLihle banoLwandle? Thola indawo emebheni
  2. Sikhathi siphi somnyaka esisendatjaneni?
  3. Kwenzakalani kilesi isikhathi somnyaka?
  4. Ingabe iTwasahlobo iyafana namkha ihlukile neyendaweni ohlala kiyo? Hlathulula.
  5. Iintjalo zitlhoga ini ukobana zikhule?
  6. Ngisiphi isikhathi somnyaka osithanda khulu? Kubayini?
  7. Ucabanga bona kubayini isikhathi somnyaka esihlathululwa endatjaneni sibizwa ngeTwasahlobo.
  8. Uyavumelana nokuthi izinto eziphilako ezifana neentjalo neelwana zakha ibhoduluko elinepilo. Hlathulula.
11
Attribution CC BY
Your attribution should include the following:
Title: ULihle noLwandle eTwasahlobo
Author/s: Tebogo Boikanyo Matshana
Translator/s: Vusi Mahlangu
Illustrator/s: Tebogo Matshana
Assurer/s: Sponono Mahlangu
Language: isiNdebele

© Zenex Foundation - Saide 2025

CC BY includes the following elements:
 BY   – Credit must be given to the creator