Wayethandwa kakhulu uKhathaza. Abazali bakhe babemnika nantoni na awayeyifuna.Yayikukuphela kwentombi yabo lo Khathaza, babebathandathu abanakwabo.Wafekethiswa kakhulu ngabazali bakhe uKhathaza.

Ngenye imini uKhathaza wafuna ukudlala ibhola ekhatywayo namakhwenkwe.“Ungenzakala ubonanje,” watsho unina emcenga.Abanakwabo bala kwaphela ukudlala ibhola ekhatywayo kunye noKhathaza. Yaqalisa ukulila le ntombi.

Emva koko, uKhathaza wazimela wemka kokwabo wangena ehlathini.“Ndiza kubonisa wonke umntu ukuba andilulo usana,” yacinga njalo le ntombi.Wakhwela emthini omde.

Abazali bakhe bamkhangela kwelo hlathi bada bamfumana uKhathaza.Bamcenga besithi makehle emthini, noxa kunjalo zange avume.

Oobhuti bakhe bazama ukuba makaxole. Bathi kuye, “Khathaza yehla, uza kuzenzakalisa.”Omnye koobhuti bakhe wamdlalela ingoma awayeyithanda, nabanye bangenelela bacula.

Waya uthotha ngokuthotha umsindo kuKhathaza.Wafumana inzolo akuyimamela ingoma leyo uKhataza.Naye wangenelela wacula nabo.Noxa kwakunjalo wayengekakulungeli ukwehlika emthini aye ezantsi.

Umhlobokazi wakhe onguSihle weza emcebisa ukuba makehle emthini.“Khathaza, ndincede, yehlika, andifuni kwahlukana nawe,” uSihle watsho ekhwaza.

Walinda ngomonde uSihle. UKhathaza wagqibela ngokuhla emthini waya phantsi. Wafika wamanga umhlobo wakhe uSihle.“Mhlobokazi wam, bekutheni ukuze ubaleke uzokukhwela kulo mthi?” wabuza uSihle.

“Khange ndithande ngoba wonke umntu undiphatha ngathi ndilusana.”“Bendifuna ukubabonisa ukuba ndingenza nantoni na enako ukwenziwa ngoobhuti bam,” yongeza ngelitshoyo le ntombazana.

Abantu bakuloKhathaza balungisa isidlo sokuvuyisana nokubuyela kwakhe kokwabo ekhuselekile.Ukususela loo mini kude kuyiwe phambili, oobhuti bakaKhathaza bavuma ukudlala naye ibhola ekhatywayo.