Document

Kgothatso Montjane, Mutambimakone wa Thenisi

Glanice Masilo

Sibusiso Khumalo

——

Heyi bugu ya nganea ndi ya Kgothatso Montjane.

O bebwa nga 1986 ngei Polokwane, ḽokishini ḽa Seshego.

Hoyu musidzana o bebwa e na vhulwadze vhu kwamaho zwanḓa na milenzhe yawe.

Fhedzi o aluwa a vha mutambi wa bvumo wa thenisi!

Vhulwadze ha Kgothatso ho ita uri madokotela vha tumule mulenzhe wawe muthihi nga fhasinyana ha gona. Zwino u shumisa mulenzhe wa mafanedza.

Musi a tshee muṱuku, vhaṅwe vhana vho vha vha sa ṱoḓi u tamba nae nga nṱhani ha vhuholefhali hawe.

Fhedzi mme awe a vho ngo mu fara sa muholefhali, nahone Kgothatso o vha e na mishumo ya hayani.

Mme a Kgothatso vho mu isa tshikoloni tsha Helen Franz Special Needs School.

Hetshi tshikolo ndi tsha vhagudiswa vha re na vhuholefhali.

Musi e kha tshenetshi tshikolo ndi hone he a sumbedza mpho yawe kha zwa mitambo.

Tshikoloni, o guda u tshina mitshino ya Ballroom na Latin America.

Muṅwe wa vhadededzi vha Kgothatso, o mu khetha uri a ye u imela tshikolo tsha hawe kha mitambo ya thenisi ngei Johannesburg.

Kgothatso o vha a sa athu vhuya a tamba thenisi!

Kgothatso o tamba zwavhuḓi kha yeneyo mitambo. Zwa vha mathomo a lwendo lwawe lwa u vha mutambi wa thenisi a dzulaho kha tshidulo tsha vhaholefhali.

O lambedzwa nga tshidulo tsha vhaholefhali na zwishumiswa zwa thenisi.

O vha e nḓilani ya u vha mutambi wa muholefhali wa nṱhesa wa Afrika Tshipembe.

Kgothatso o thoma u dzhenela miṱaṱisano ya vhathu vha re kha zwidulo zwa vhaholefhali u mona na shango.

O fhenya kha miṱaṱisano ya ngei Belgium na Switzerland. O vha a tshi funesa muṱaṱisano wa ngei Switzerland.

Fhano Afrika Tshipembe, o ṋewa zwiphuga luraru lwoṱhe sa mutambi wa ṅwaha wa mufumakadzi a re na vhuholefhali.

Nga 2013 na 2014, Kgothatso o shela mulenzhe kha miṱaṱisano ya mitambo ya thenisi ngei Australia, Fura, na Amerika.

O tamba e eṱhe kha dzi single. A dovha a tamba na kha dzi double, hune vhatambi vhavhili vha ṱaṱisana na vhaṅwe vhavhili.

Kgothatso o dovha a ṱaṱisana kha Mitambo ya Vhaholefhali, ine ya vha Mitambo ya Dzioḽimpiki ya vhatambi vho holefhalaho.

U ḓilugiselela yeneyi miṱaṱisano zwo vha zwi tshi ṱoḓa vhuḓidini vhuhulwane, fhedzi Kgothatso ho ngo laṱela thaula.

Kgothatso o dovha a vha mushumi wa biko kha pfunzo dzawe. O ya Yunivesithi ya Venda a gudela digirii ya Saintsi ya zwa u Ḓimvumvusa na Mitambo.

Ngei yunivesithi, mutambo wa thenisi wa vho dzulaho tshiduloni tsha vhaholefhali wo vha u wone fhedzi u re hone u itela vhatambi vho holefhalaho.

Wimbledon ngei England ndi fhethu hune miṱaṱisano i re na bvumo na ya kale ya thenisi ya farelwa hone ṅwaha muṅwe na muṅwe.

Nga 2018, Kgothatso o vha mufumakadzi wa u thoma wa Murema wa Afrika Tshipembe we a dzhenela muṱaṱisano wa vhugwena ngei Wimbledon.

Kgothatso o vha o fanela u fara lwendo lwa u ya England uri a tambe Wimbledon.

Fhedzi ho vha hu si na masheleni a u badela bufho na vhudzulo.

Kgothatso o vha a tshi khou vhilaela uri a nga si ye nga nṱhani ha u sa vha na masheleni.

Zwi takadzaho ndi uri o wana thuso kha tshigwada tsha vhafumakadzi vha re na mabindu.

Nga 2018, Kgothatso o vha a tshi khou ya u dzhenela miṱaṱisano ya Wimbledon ya Grand Slam lwa vhuṋa.

Miṱaṱisano miṋa ya ndeme ya thenisi ya shango ḽoṱhe i ḓivhiwa sa Grand Slam.

O vha mutambi wa u thoma wa thenisi wa Muafrika o dzulaho tshiduloni tsha vhaholefhali we a vha kha muṱaṱisano wa dzi Grand Slam nṋa nga ṅwaha muthihi.

Kgothatso ndi mutambi wa thenisi a re tshiduloni tsha vhaholefhali wa vhuimo ha nṱha fhano Afrika Tshipembe na Afurika. U vhalwa vhukati ha vhatambi vhaṱanu vha thenisi vha dzulaho tshiduloni tsha vhaholefhali shangoni ḽoṱhe.

Naho o bvelela, Kgothatso u thusa na u tikedza vhaṅwe vhatambi vha re na vhuholefhali.

U ri sumbedza uri ni nga ita tshiṅwe na tshiṅwe, naho ni muholefhali.

——Mbudziso

Kgothatso Montjane ndi nnyi? Ṱalutshedzani.
Zwo ḓa hani uri Kgothatso a thome u tamba thenisi?
Ṋeani dzina ḽa tshikolo tshe Kgothatso a guda khatsho u tshina mitshino ya Ballroom na Latin America?
Kgothatso o dzhenela lini miṱaṱisano ya Wimbledon ya Grand Slam? Ndi ngani zwi zwa ndeme?
Naa ni a tenda uri ni nga swikelela tshiṅwe na tshiṅwe, naho ni na vhuholefhali? Ṱalusani.
Ndi khaedu dzifhio dzine muthu ane a shumisa tshidulo tsha vhaholefhali a sedzana nadzo?
Ni humbula uri ndi ngani mme a Kgothatso vho khetha u mu fara nga nḓila i fanaho na ine vha fara ngayo vhaṅwe?
Ndi zwifhio zwithu zwine zwa ita uri vhathu vha fare vhaṅwe nga nḓila dzi sa fani?

——

Heyi bugu ya nganea yo ṅwalwa nga Lutswana sa tshipiḓa tsha phurodzhekthe ya matheriaḽa dza u vhala ya Zenex Ulwazi Lwethu ya 2021.

Your attribution should include the following:
Title: Kgothatso Montjane, Mutambimakone wa Thenisi
Author/s: Glanice Masilo
Translator/s: Doris Manyamalala
Illustrator/s: Sibusiso Khumalo
Assurer/s: Tshedza Tlhako
Language: Tshivenḓa

© Zenex Foundation - Saide 2025

CC BY includes the following elements:
BY

– Credit must be given to the creator