Kgothatso Montjane, Indlovukati Yethenisi
Glanice Masilo
Sibusiso Khumalo
Siswati
Read aloud

——


Le ncwadzi yetindzaba imayelana naKgothatso Montjane.
-
Watalwa nga-1986 ePolokwane, elokishini laseSeshego.
-
Le ntfombatane yatalwa inekugula lokwakhinyabeta tandla netinyawo tayo.
-
Kepha yakhula yaba silomo lesatiwako sethenisi!
1
Ngenca yekugula kwaKgothatso, bodokotela kwadzingeka kutsi bajube lomunye wemilente yakhe ngaphasi kwelidvolo. Usebentisa umlente wekufakelwa.
-
Asengumntfwana, labanye bantfwana bebangafuni kudlala naye ngoba akhubatekile.
-
Kepha make wakhe bekangamphatsi ngendlela leyehlukile kulabanye, futsi Kgothatso bekayenta imisebenti yasendlini.
2
Make waKgothatso wamfaka Esikolweni Salabanetidzingo Letikhetsekile eHelen Franz. Lesi sikolwa sebafundzi labanekukhubateka.
-
Kwaba kulesikolwa lapho akhombisa khona emakhono akhe kutemdlalo.
-
Esikolweni, bamfundzisa umdanso Welunyawo Lwempungushe kanye newaseLatin America.
3
Lomunye wabothishela baKgothatso wakhetsa yena kutsi amelele sikolwa sabo enkambu yethenisi lebeyiseJozi.
-
Kgothatso bekangakaze adlale ithenisi.
-
4
Kgothatso wadlala kahle enkambu yethenisi. Loku kwaba sicalo seluhambo lwekuba ngumdlali wethenisi yalabasesihlalweni salabakhubatekile emhlabeni.
-
Watfola umnikelo wekutsenga sihlalo salabakhubatekile kanye netintfo tethenisi.
-
Watfutfukela ekubeni ngulomunye webadlali labakhubatekile labaphambili e-Afrika.
5
Kgothatso wacala kuncintisana emichudzelwaneni yethenisi yalabasesihlalweni salabakhubatekile emhlabeni wonkhe.
-
Wawina emchudzelwaneni waseBelgium naseSwitzerland. Wawutsandza kakhulu umchudzelwano wethenisi waseSwitzerland.
-
ENingizimu Afrika, wahlonishwa tikhatsi letintsatfu njengemdlali wemnyaka kulabaphila nekukhubateka.
6
Nga-2013 nanga-2014, Kgothatso wangenela imichudzelwano yethenisi yalabasesihlalweni salabakhubatekile e-Australia, eFrance, naseMelika.
-
Wadlala ithenisi njengemdlali loyedwa. Waphindze wadlala emidlalweni ledlalwa ngababili labachudzelana nalabanye badlali lababili.
7
Kgothatso waphindze wachudzelana kuma-Paralympic Game, loku midlalo yema-Olimpiki yebantfu labakhubatekile.
-
Kutilolongela lemichudzelwano kwaba ngumsebenti lomatima, kepha Kgothatso akamange aphele emandla.
8
Kgothatso waphindze wasebenta kamatima etifundvweni takhe. Waya eNyuvesi yaseVenda futsi watfola ticu te-Recreation and Sports Science.
-
Enyuvesi, ithenisi yalabasesihlalweni salabakhubatekile beyikuphela kwemdlalo lebewukhona webantfu labaphila nekukhubateka.
9
EWimbledon eNgiladi ngulapho kubanjelwa khona minyaka yonkhe imichudzelwano yethenisi lemidzala naledvumile.
-
Nga-2018, Kgothatso waba ngulomsikati wekucala lomnyama eNingizimu Afrika emichudzelwaneni yabomphetsa eWimbledon.
10
Kwadzingeka kutsi Kgothatso aye eNgilandi emchudzelwaneni wendzebe yaseWimbledon.
-
Kepha bekute imali tekukhokhela indiza kanye nendzawo yekulala.
-
Kgothatso bekakhatsatekile ngekutsi ngeke akwati kuya ngobe timali betingekho.
-
Ngenhlanhla, watfola lusito ecenjini labosomabhizinisi labasikati!
11
Nga-2018 Kgothatso watfola indzebe ye-Grand Slam yesine eWimbledon.
-
Imichudzelwano lemine yethenisi yemave emhlaba lebaluleke kakhulu yatiwa ngekutsi ngema-Grand Slam.
-
Waba ngumdlali wekucala wethenisi yalabasesihlalweni salabakhubatekile e-Afrika kutsi ahudzelane etindzebeni letine tema-Grand Slam ngemnyaka munye.
12
Kgothatso ngumdlali lohamba embili wethenisi yalabasesihlalweni salabakhubatekile eNingizimu Afrika nase-Afrika yonkhana. Ungulomunye webadlali bethenisi yalabasesihlalweni salabakhubatekile labasihlanu labahamba phambili emhlabeni wonkhe!
-
Ngetulu kwemphumelelo yakhe, Kgothatso usita ngekusekela badlali labaphila nekukhubateka.
-
Uyababonisa kutsi umuntfu angaba ngunobe yini, ngisho nobe aphila nekukhubateka.
13

——Imibuto


  1. Ngubani Kgothatso Montjane? Chaza.
  2. Wacala njani kudlala ithenisi Kgothatso?
  3. Yini ligama lesikolwa saKgothatso, lafundza kuso umdanso Welunyawo Lwempungushe kanye newaseLatin America?
  4. Kukuphi lapho Kgothatso achudzelana khona ngetindzebe letine te-Grand Slam? Yini leyenta loku kubaluleke?
  5. Uyakholwa yini kutsi ungaphumelela kunoma yini, ngisho noma uphila ngekukhubateka? Chaza.
  6. Ngubuphi bumatima umuntfu losebentisa sihlalo salabakhubatekile langahlangabetana nabo?
  7. Ucabanga kutsi yini leyenta make waKgothatso wakhetsa kungamphatsi ngendlela lehlukile Kgothatso?
  8. Ngutiphi tintfo letenta bantfu baphatse labanye ngendlela lehlukile?
14

——


Lencwadzi yetindzaba icanjwe futsi yabhalwa ngeSetswana, njengencenye yetinsita tekufundza teZenex Ulwazi Lwethu nga-2021.
15
16
Attribution CC BY
Your attribution should include the following:
Title: Kgothatso Montjane, Indlovukati Yethenisi
Author/s: Glanice Masilo
Translator/s: Mduduzi Benjie Shongwe
Illustrator/s: Sibusiso Khumalo
Assurer/s: Simangele Khoza
Language: Siswati

© Zenex Foundation - Saide 2025 (Updated Edition)

CC BY includes the following elements:
 BY   – Credit must be given to the creator